တီဗွီကြည့်ရတာကို ကျွန်တော်တို့ လူသားတွေအားလုံး ကြိုက်နှစ်သက်ကြပါတယ်။ ဒါပေမယ့် အချိန်ကြာမြင့်စွာ တီဗွီကြည့်ခြင်းကြောင့် ကျန်းမာရေးဆိုင်ရာ ဘေးထွက်ဆိုးကျိုးတွေကို ခံစားရနိုင်ပါတယ်။ ဒါကြောင့် တီဗွီအကြည့်များခြင်းကြောင့် ခံစားရနိုင်တဲ့ ဘေးထွက်ဆိုးကျိုးတွေကို Careme ပရိသတ်ကြီး သိရှိစေဖို့အတွက် အခုလိုဖော်ပြပေးလိုက်ရတာပဲ ဖြစ်ပါတယ်။

• အဝလွန်ခြင်း

အချိန်ကြာမြင့်စွာ တီဗွီကြည့်ခြင်းကြောင့် အဓိက ခံစားရစေနိုင်တဲ့ ကျန်းမာရေးဆိုင်ရာ ဘေးထွက်ဆိုးကျိုးကတော့ အဝလွန်ခြင်းပဲ ဖြစ်ပါတယ်။ လေ့လာတွေ့ရှိချက်တွေအရ တစ်နေ့ကို ၂ နာရီခန့် နေ့စဉ်ပုံမှန် တီဗွီကြည့်မယ်ဆိုရင် တီဗွီ ပုံမှန်မကြည့်သူတွေထက် ၂၃ ရာခိုင်နှုန်း ပိုမိုအဝလွန်စေမှာ ဖြစ်ပါတယ်။

• ဆီးချိုအမျိုးအစား ၂ ဖြစ်ပွားစေခြင်း

တစ်နေ့ကို ၂ နာရီခန့် တီဗွီပုံမှန်ကြည့်ခြင်းကြောင့် ဆီးချိုအမျိုးအစား ၂ ကို ဖြစ်ပွားစေနိုင်သလို နှလုံးရောဂါကိုလည်း ဖြစ်ပွားစေနိုင်ပါတယ်။

• အရွယ်မတိုင်ခင် သေဆုံးခြင်း

ဒါ့အပြင် လေ့လာတွေ့ရှိချက်တွေအရ တစ်နေ့ကို သုံးနာရီထက်မနည်း တီဗွီပုံမှန်ကြည့်ရှုခဲ့မယ်ဆိုရင် အရွယ်မတိုင်ခင် သေဆုံးခြင်းကို ဖြစ်ပွားစေနိုင်တယ်လို့ သိရပါတယ်။

• သုက်ထုတ်လွှတ်မှု နည်းပါးခြင်း

အမျိုးသားတွေ အနေနဲ့လည်း တစ်ပတ်ကို နာရီ ၂၀ ခန့် တီဗွီပုံမှန်ကြည့်ရှုမယ်ဆိုရင် သုက်ထုတ်လွှတ်မှုကို နည်းပါးစေမှာဖြစ်ပါတယ်။ ဒါကြောင့် အိမ်ထောင်ရှင် အမျိုးသားတွေ အနေနဲ့ ကလေးယူဖို့ စိတ်ကူးရှိမယ်ဆိုရင် အချိန်ကြာမြင့်စွာ တီဗွီကြည့်ခြင်းကို တတ်နိုင်သလောက် လျှော့ချသင့်ပါတယ်။

• အိပ်ချိန်နည်းပါးစေခြင်း

ဇာတ်လမ်းကောင်းလေးတွေ ကြည့်နေရမယ်ဆိုရင် ကျွန်တော်တို့အနေနဲ့ ထမင်းမေ့ဟင်းမေ့ ကြည့်လေ့ရှိတဲ့အပြင် တစ်ခါတရံမှာ အိပ်ချိန်တွေကိုပါ ထိခိုက်စေတဲ့အထိ တီဗွီကို အလွန်အကျွံကြည့်ရှုလေ့ ရှိကြပါတယ်။ ဒါကြောင့် အိပ်ချိန်နည်းပါးသွားပြီး ကျန်းမာရေးဆိုင်ရာ ဘေးထွက်ဆိုးကျိုးတွေကို ခံစားရနိုင်ပါတယ်။

• အူမကြီးကင်ဆာရောဂါဖြစ်ပွားစေခြင်း

ဒါ့အပြင် အချိန်ကြာမြင့်စွာ တီဗွီကြည့်ခြင်းကြောင့် အသက် ၅၀ နှစ်အောက် လူပုဂ္ဂိုလ်တွေမှာ အူမကြီးကင်ဆာရောဂါကို ဖြစ်ပွားစေနိုင်ပါတယ်။

REF: EverydayHealth