ကျွန်တော်တို့ နေ့စဉ်စားသုံးနေတဲ့ အသီးအနှံတွေ၊ အသီးအရွက်တွေမှာ ဗီတာမင် C ဓာတ်ကြွယ်ဝစွာ ပါဝင်လျက်ရှိတဲ့အပြင် ဗီတာမင် C အနေနဲ့ ကျွန်တော်တို့ ခန္ဓာကိုယ်အတွက် အရေးပါတဲ့ အစိတ်အပိုင်းတစ်ခု အဖြစ် ပါဝင်လျက်ရှိပါတယ်။

ဗီတာမင် C ပါဝင်တဲ့ အစားအစာတွေကို စားသုံးပေးခြင်းကြောင့် ကျွန်တော်တို့ ခန္ဓာကိုယ်အတွင်းမှ ပျက်ဆီးနေတဲ့ ဆဲလ်တွေကို ပြန်လည် တည်ဆောက်ပေးသွားမှာ ဖြစ်တဲ့အပြင် ဖျားနာခြင်း၊ ကင်ဆာရောဂါ ဖြစ်ပွားခြင်းတို့ကိုလည်း ကာကွယ်ပေးသွားမှာ ဖြစ်ပါတယ်။ ဒါ့အပြင် အရိုးအဆစ်များ သန်မာစေခြင်း၊ အသားအရေ ချောမွေ့လှပစေခြင်း၊ အစာချေစနစ် ကောင်းမွန်စွာ လည်ပတ်စေခြင်းစတဲ့ အကျိုးကျေးဇူးတွေကိုလည်း ရရှိနိုင်မှာ ဖြစ်ပါတယ်။

လေ့လာတွေ့ရှိချက်တွေအရ ဗီတာမင် C ပါဝင်တဲ့ အစားအစာ‌တွေကို နေ့စဉ်ပုံမှန် စားသုံးပေးခြင်းကြောင့် နှလုံးရောဂါဖြစ်ပွားမှုကို ကာကွယ်ပေးနိုင်မှာ ဖြစ်သလို အဆုတ်အအေးမိရောဂါ၊ ဦးနှောက်ကျူမာရောဂါ၊ အဆုတ်ကင်ဆာရောဂါ ဖြစ်ပွားမှုတို့ကိုလည်း ကာကွယ်ပေးနိုင်မှာ ဖြစ်ပါတယ်။ ဒါ့အပြင် သွေးလည်ပတ်မှုကိုလည်း ကောင်းမွန်စေမှာ ဖြစ်တယ်လို့ သိရပါတယ်။

တကယ်လို့ ကျွန်တော်တို့ ခန္ဓာကိုယ်အတွင်းမှာ ဗီတာမင် C လုံလောက်ခဲ့ခြင်း မရှိဘူးဆိုရင် အရိုးအဆစ်များ နာကျင်ကိုက်ခဲခြင်း၊ သွေးထွက်လွယ်ခြင်း၊ အမောမခံနိုင်ခြင်း၊ အနာကျက်ဖို့ခက်ခဲခြင်း၊ စိတ်ဓါတ်ကျခြင်း၊ သွားကျိုးလွယ်ခြင်းစတဲ့ ရောဂါဝေဒနာတွေကို ခံစားရနိုင်ပါတယ်။

ဗီတာမင် C ဓာတ်ကြွယ်ဝစွာ ပါဝင်တဲ့ အစားအစာတွေကတော့ :

• မာလကာသီး
• ခရမ်းချဉ်သီး
• လိမ္မော်သီး
• ငရုတ်သီးစိမ်း
• စထရော်ဘယ်ရီသီး
• သင်္ဘောသီး
• ဂေါ်ဖီစိမ်း
• နာနတ်သီး
• အာလူး
• ကီဝီသီး
• သရက်သီး
• သံပုရာသီး
• ပန်းဂေါ်ဖီတို့ပဲ ဖြစ်ပါတယ်။

ဒါပေမယ့် ဗီတာမင် C ပါဝင်တဲ့ အစားအစာတွေ၊ ဖြည့်စွက်ဆေးတွေကို အလွန်အကျွံ စားသုံးခဲ့မယ် ဆိုရင်တော့ ဝမ်းပျက်ခြင်း၊ အစာအိမ်နဲ့အူလမ်းကြောင်းဆိုင်ရာ ရောဂါများ ဖြစ်ပွားခြင်းတို့ကို ဖြစ်စေနိုင်သလို ကျောက်ကပ်မှာ ကျောက်တည်ခြင်းတို့ကိုလည်း ဖြစ်စေနိုင်ပါတယ်။

အနှစ်ချုပ်အနေနဲ့ ပြောရမယ်ဆိုရင် ဗီတာမင် C ကြွယ်ဝတဲ့ အစားအစာတွေကို စားသုံးပေးခြင်းကြောင့် ကျွန်တော်တို့ ခန္ဓာကိုယ် ကျန်းမာရေးကို အထူး အထောက်အကူဖြစ်စေမှာ ဖြစ်ပေမယ့် တန်ဆေးလွန်ဘေးဆိုတဲ့ ဆိုရိုးစကား ရှိတဲ့အတိုင်း ဗီတာမင် C ဓာတ် လွန်ကဲသွားခဲ့မယ် ဆိုရင်လည်း ကောင်းကျိုးထက် ဆိုးကျိုးကို ဖြစ်စေနိုင်တာကြောင့် ချင့်ချိန်ပြီး စားသုံးဖို့ အကြံပေးလိုက်ပါရစေ။

REF: MedicalNewsToday