လေဖြတ်ခြင်းဝေဒနာ ဖြစ်ပွားရခြင်းရဲ့ အဓိကအကြောင်းအရင်းကတော့ ဦးနှောက်ကို ပို့ဆောင်ပေးနေတဲ့ သွေးကြောပိတ်ခြင်း၊ သွေးကြောပေါက်ခြင်းတို့ ဖြစ်ပေါ်ပြီး ဦးနှောက်အတွင်း ‌အောက်စီဂျင်ဓါတ် ပြတ်တောက်သွားကာ ခန္ဓာကိုယ်ကို စေခိုင်းနေတဲ့ ဦးနှောက်ဆဲလ်များ သေဆုံးသွားခြင်းကြောင့်ပဲ ဖြစ်ပါတယ်။ ဒါ့အပြင် တစ်နှစ်ကို ကမ္ဘာ့လူဦးရေ ၁၅ သန်းခန့် လေဖြတ်ဝေဒနာကို ခံစားနေရပြီး ၆ သန်းခန့် လေဖြတ်ဝေဒနာကြောင့် သေဆုံးခဲ့ရပါတယ်။

အဓိကအားဖြင့် လေဖြတ်ရောဂါ အမျိုးအစားနှစ်မျိုး ရှိပါတယ်။

• ဦးနှောက်တွင်း သွေးကြောပိတ်ပြီး လေဖြတ်ခြင်း
• ဦးနှောက်တွင်း သွေးကြောပေါက်ပြီး လေဖြတ်ခြင်း

ဒီတော့ လေဖြတ်ခြင်းကို ဖြစ်ပေါ်စေနိုင်တဲ့ အကြောင်းအရင်းတွေကို ဆက်ပြီးလေ့လာကြည့်လိုက်ရအောင်။

• အဝလွန်ခြင်း
• ကိုယ်လက်လှုပ်ရှားမှုမရှိခြင်း
• အရက်အလွန်အကျွံသောက်သုံးခြင်း
• မူးယစ်ဆေးဝါးသုံးစွဲခြင်း
• ဆေးလိပ်သောက်ခြင်း၊ တဆင့်ခံဆေးလိပ်ငွေ့ရှူရှိုက်ခြင်း
• သွေးအတွင်းအဆီဓါတ်များခြင်း
• စိတ်ကျဝေဒနာခံစားနေရခြင်း
• နှလုံးရောဂါခံစားနေရခြင်း
• ဆီးချို သွေးချိုရောဂါရှိခြင်း
• သွေးပေါင်ချိန်မြင့်တက်ခြင်း
• လည်ပင်းသွေးကြောထူခြင်း/ ကျဉ်းခြင်း
• အသက်ကြီးလာခြင်း

အသက် (၅၅) နှစ်အထက် လူပုဂ္ဂိုလ်တွေအနေနဲ့ လေဖြတ်ရောဂါကို ငယ်ရွယ်သူတွေထက် ပိုမိုခံစားရလေ့ ရှိပါတယ်။

• အမျိုးသားဖြစ်ခြင်း

လေ့လာတွေ့ရှိချက်တွေအရ လေဖြတ်ဝေဒနာကို အမျိုးသားတွေ အနေနဲ့ အမျိုးသမီးတွေထက် ပိုမိုခံစားရလေ့ရှိတယ်လို့ သိရပါတယ်။ ဒါပေမယ့် လေဖြတ်ဝေဒနာကြောင့် အသက်သေဆုံးမှုမှာတော့ အမျိုးသမီးတွေက အမျိုးသားတွေထက် ပိုမိုများပြားလျက်ရှိပါတယ်။

• မျိုးရိုးလိုက်ခြင်း

တကယ်လို့ သင့်ရဲ့မိဘမျိုးရိုးထဲမှာ လေဖြတ်ဝေဒနာခံစားခဲ့ရသူ ရှိခဲ့မယ်ဆိုရင်လည်း သင့်အနေနဲ့ လေဖြတ်ဝေဒနာကို ခံစားရနိုင်ပါတယ်။

အခုဆိုရင် လေဖြတ်ဝေဒနာဖြစ်ပွားရခြင်း အကြောင်းအရင်းတွေကို သိရှိသွားပြီဖြစ်တာကြောင့် လေဖြတ်ဝေဒနာ စတင်ခံစားရစဉ်အချိန်မှာ ကြုံတွေ့ရလေ့ရှိတဲ့ ရောဂါလက္ခဏာတွေကို လေ့လာကြည့်လိုက်ရအောင်။

• အမြင်ဝေဝါးခြင်း
• စကားပြောရာမှာ အခက်အခဲများနဲ့ ရင်ဆိုင်ရခြင်း
• အခြားသူများပြောတာကို နားမလည်ခြင်း
• မကြာခဏ အပြင်းအထန် ခေါင်းကိုက်ခြင်း
• မျက်နှာ၊ လက်၊ ခြေထောက်တို့ ရုတ်တရုက်ထုံထိုင်းခြင်း၊ လှုပ်မရခြင်း
• လမ်းလျှောက်ရာမှာ အခက်အခဲများနဲ့ ရင်ဆိုင်ရခြင်းစတဲ့ ရောဂါလက္ခဏာတွေကို ခံစားရလေ့ရှိပါတယ်။

တကယ်လို့ သင့်အနေနဲ့ ဖော်ပြပါ ရောဂါလက္ခဏာတွေကို ခံစားနေရပြီဆိုရင်တော့ သက်ဆိုင်ရာဆရာဝန်နဲ့ ဆွေးနွေးတိုင်ပင်ပြီး အမြန်ဆုံး ကုသသင့်ပါတယ်။

REF: Wikipedia, MayoClinic, WebMd