မျက်လုံးဆိုတာကလည်း ကျွန်တော်တို့ခန္ဓာကိုယ်ရဲ့ အရေးကြီးတဲ့အစိတ်အပိုင်းတွေထဲက တစ်ခုအပါအဝင် ဖြစ်ပါတယ်။ တကယ်လို့ ကွန်ပြူတာတွေ၊ ဖုန်းတွေကို တစ်နေ့တာလုံး အသုံးပြုနေခဲ့မယ်ဆိုရင် အမြင်အာရုံ ဝေဝါးခြင်း၊ မျက်လုံးညောင်းကိုက်ခြင်းစတဲ့ ဝေဒနာတွေကို ခံစားရနိုင်ပါတယ်။ ဒါကြောင့် အမြင်အာရုံ ကြည်လင်စေပြီး မျက်လုံးညောင်းကိုက်မှုကို သက်သာပျောက်ကင်းစေဖို့အတွက် အလွယ်တကူ လုပ်ဆောင်နိုင်မယ့် နည်းလမ်းတွေကို အခုလို ဖော်ပြပေးလိုက်ရတာ ဖြစ်ပါတယ်။

• ကျန်းမာရေးနဲ့ ညီညွတ်အောင်စားသောက်ပါ

အမြင်အာရုံကြည်လင်စေဖို့အတွက် အဓိကလုပ်ဆောင်ရမယ့် အချက်ကတော့ ကျန်းမာရေးနဲ့ ညီညွတ်အောင် နေထိုင် စားသောက်ဖို့ပဲ ဖြစ်ပါတယ်။ အိုမီဂါ ၃ ဖက်တီးအက်စစ်၊ လူတင်း (lutein) ၊ ဇင့်၊ ဗီတာမင် C၊ ဗီတာမင် E ဓာတ်တွေ ပါဝင်တဲ့ အစားအသောက်တွေကို ပုံမှန်စားသောက်ပေးမယ်ဆိုရင် အတွင်းတိမ်ဖြစ်ခြင်း၊ အမြင်အာရုံဝေဝါးခြင်းတို့ကို ကာကွယ်ပေးနိုင်မှာ ဖြစ်ပါတယ်။

• အစိမ်းရောင်အသီးအနှံတွေဖြစ်တဲ့ ဟင်းနုနွယ်၊ ကိုက်လန်၊ ဂေါ်ဖီရွက်တို့မှာ လူတင်း၊ ဇင့်၊ ဗီတာမင် C တို့ပါဝင်ပါတယ်။
• ဆဲလ်မွန်၊ တူနာ၊ ဆာဒင်းငါးတို့မှာလည်း အိုမီဂါ (၃) ဖက်တီးအက်စစ် ပါဝင်ပါတယ်။
• ကြက်ဥ၊ အခွံမာသီးများ၊ ပဲများတို့မှာလည်း အိုမီဂါ (၃) ဖက်တီးအက်စစ်၊ ပရိုတင်းတို့ ပါဝင်ပါတယ်။
• လိမ္မော်သီးနဲ့ အခြားအချဉ်အရသာရှိသော အသီးတွေမှာလည်း ဗီတာမင် C ဓာတ်ပါဝင်ပါတယ်။
• ခရုကမာတွေမှာလည်း ဗီတာမင် A၊ ဗီတာမင် E၊ ဗီတာမင် C၊ ဇင့်၊ သံဓာတ်၊ ကယ်ဆီယမ်၊ ဗီတာမင် B12 တို့ပါဝင်ပါတယ်။ 

• ဆေးလိပ်ဖြတ်ပါ

သင့်အနေနဲ့ ဆေးလိပ်ကို စွဲမြဲနှစ်ခြိုက်စွာ သောက်သုံးခဲ့မယ်ဆိုပါက သင့်အနေနဲ့ အခြားသော ကျန်းမာရေးဆိုင်ရာ ဆိုးကျိုးတွေအပြင် အတွင်းတိမ်ရောဂါကိုပါ ဖြစ်ပွားစေနိုင်ပါတယ်။ တကယ်လို့ သင့်အနေနဲ့ ဆေးလိပ်ဖြတ်ခဲ့မယ် ဆိုရင်တော့ အတွင်းတိမ်ရောဂါဖြစ်ပွားမှုကို ကာကွယ်နိုင်မှာ ဖြစ်ပါတယ်။

• နေကာမျက်မှန် တပ်ဆင်ပါ

သင့်အနေနဲ့ နေပူထဲမှာ အမြဲတစေ သွားလာလှုပ်ရှားနေရမယ်ဆိုရင် နေကာမျက်မှန် တပ်ထားခြင်းဖြင့် ခရမ်းလွန်ရောင်ခြည် သက်ရောက်မှုကို ဟန့်တားနိုင်မှာ ဖြစ်ပါတယ်။ ခရမ်းလွန်ရောင်ခြည်ကြောင့် အတွင်းတိမ်ဖြစ်ခြင်း၊ အဝေးမှုန်ခြင်းစတဲ့ ဝေဒနာတွေကို ခံစားရနိုင်တာကြောင့် နေပူထဲမှာ သွားလာလှုပ်ရှားနေရမယ်ဆိုရင် နေကာမျက်မှန်ကို တပ်ဆင်ထားသင့်ပါတယ်။

• မျက်စိကို မကြာခဏ အနားပေးပါ

တကယ်လို့ သင့်အနေနဲ့ ကွန်ပြူတာ ဒါမှမဟုတ် စမတ်ဖုန်းကိုအချိန်အကြာကြီး သုံးစွဲခဲ့မယ်ဆိုရင်

1.  မျက်စိနာခြင်း
2.  အမြင်ဝေဝါးခြင်း
3. အဝေးမှုန်ခြင်း
   
4. မျက်လုံးခြောက်ခြင်း
5. ခေါင်းကိုက်ခြင်း
6. ဇက်ကြောတက်ခြင်းစတဲ့ ဝေဒနာတွေကို ခံစားရနိုင်ပါတယ်။

ဒါကြောင့် ကွန်ပြူတာ/ စမတ်ဖုန်းကို မိနစ် (၆၀) ခန့်အသုံးပြီးတိုင်း (၁/ ၂) မိနစ်ခန့် မျက်လုံးကို အနားပေးသင့်ပါတယ်။

• လေကောင်းလေသန့် ရှူရှိုက်ပေးပါ

လေကောင်းလေသန့်ကို ရှူရှိုက်ပေးခြင်းကြောင့် အဆုတ်နဲ့ နှလုံးကျန်မားရေးကို ကောင်းမွန်စေတဲ့အပြင် ‌ မျက်ကြည်လွှာကျန်းမာရေးကိုပါ ကောင်းမွန်စေမှာဖြစ်ပါတယ်။

• ကောင်းမွန်စွာ အိပ်စက်အနားယူပါ

တကယ်လို့ သင့်အနေနဲ့ အိပ်ချိန်မှန်မှန် အိပ်စက်ခြင်း မရှိဘူးဆိုရင် ဒါမှမဟုတ် အိပ်ချိန်လုံလောက်ခြင်း မရှိဘူးဆိုရင် မျက်လုံးနာခြင်း၊ မျက်လုံးညောင်းကိုက်ခြင်းစတဲ့ ဝေဒနာတွေကို ခံစားရနိုင်ပါတယ်။

• တစ်လတစ်ကြိမ် ဆရာဝန်နဲ့ပြသပေးပါ

ကျွန်တော်တို့ လူသားတွေ အနေနဲ့ တစ်လကိုတစ်ကြိမ်ခန့် မျက်စိဆရာဝန်နဲ့ စမ်းသပ်ပြသပေးသင့်ပါတယ်။  ဒီလိုဆိုမှသာ မျက်လုံးပါဝါတက်နေခြင်း ရှိမရှိ၊ တိမ်ဖြစ်နေခြင်း ရှိမရှိကို သိရှိပြီး လိုအပ်တဲ့ကုသမှုကို ခံယူနိုင်မှာ ဖြစ်ပါတယ်။

REF: WebMD