ဆံပင်ကျွတ်ခြင်းဆိုတဲ့ပြဿနာကို ကမ္ဘာ့လူဦးရေရဲ့ သုံးပုံတစ်ပုံခန့် ခံစားနေရပါတယ်။ လေ့လာတွေ့ရှိချက်တွေ အရ လူတစ်ယောက်အနေနဲ့ တစ်နေ့ကို ဆံပင်မွေး (၁၀၀) ခန့် ကျွတ်လေ့ရှိပါတယ်။ ဒီတော့ ဆံပင်မွေးတွေ လိုတာထပ်ပိုပြီး ကျွတ်ရခြင်း မရှိလေအောင် ယခုဖော်ပြပေးမယ့် နည်းလမ်းတွေကို လိုက်နာကျင့်သုံးသင့်ပါတယ်။

• ရှန်ပူအပျော့စားနဲ့ ပုံမှန်ခေါင်းလျှော်ပေးပါ

ခေါင်းပုံမှန်လျှော်ပေးခြင်းကြောင့် ဆံပင်ကျွတ်ခြင်းကို ကာကွယ်ပေးနိုင်မှာဖြစ်သလို ဦးရေပြားသန့်ရှင်းမှုကိုလည်း ထိန်းသိမ်းပြီးသား ဖြစ်စေမှာ အသေအချာပါပဲ။ ဒါပေမယ့်လည်း ခေါင်းလျှော်တဲ့အခါမှာ ရှန်ပူအပြင်းစားတွေ အသုံးပြုမယ်ဆိုရင် မလိုလားအပ်တဲ့ ဦးရေပြားဆိုင်ရာပြဿနာတွေနဲ့ ရင်ဆိုင်ရတာကြောင့် ခေါင်းလျှော်မယ်ဆိုရင် ရှန်ပူအပျော့စားကိုသာ ဦးစားပေးရွေးချယ် အသုံးပြုသင့်ပါတယ်။

• ဗီတာမင်ဖြည့်စွက်စာများ စားသုံးပေးပါ

ကျွန်တော်တို့ခန္ဓာကိုယ် ကျန်းမာသန်စွမ်းစေဖို့အတွက် ဗီတာမင်ဓါတ်တွေလိုအပ်သလို ဆံပင်ကျွတ်ခြင်းဝေဒနာကို ခံစားရခြင်းမရှိစေဖို့လည်း ဗီတာမင်ဓါတ်တွေ လိုအပ်ပါတယ်။ ဗီတာမင် A ဓါတ်ကြောင့် ဆံပင်ကျန်းမာသန်စွမ်းမှုကို အထောက်အကူ ဖြစ်စေမှာဖြစ်သလို ဗီတာမင် B ဓါတ်ကြောင့် ဆံပင် နက်မှောင်သန်စွမ်းမှုကို အထောက်အကူ ဖြစ်စေမှာပါ။

• ဦးရေပြားကို ဆီလိမ်းနှိပ်နယ်ပေးပါ

တကယ်လို့ သင့်အနေနဲ့ ဆံပင်ကျွတ်ခြင်းဝေဒနာကို ခံစားနေရမယ်ဆိုပါက ဦးရေပြားကို သံလွင်ဆီ၊ အုန်းဆီစတဲ့ ဆီတစ်မျိုးမျိုးကို ဦးရေပြားမှာ လိမ်းပြီး နှိပ်နယ်ပေးခြင်းဖြင့် ဆံပင်ကျွတ်ခြင်းဝေဒနာကို ဟန့်တားနိုင်မှာ ဖြစ်ပါတယ်။ ဒါ့အပြင် မကြာခဏ ခေါင်းဖြီးခြင်းကြောင့်လည်း ဆံပင်ကျွတ်စေနိုင်ပါတယ်။

• ရေဓာတ်ကို ပုံမှန်ဖြည့်တင်းပေးပါ

ခန္ဓာကိုယ်အတွင်းမှာ ရေဓာတ်ခမ်းခြောက်နေမယ် ဆိုရင်လည်း ဆံပင်ကျွတ်ခြင်းဝေဒနာကို ခံစားရနိုင်တာကြောင့် တစ်နေ့ကို ရေ (၄) ခွက်က‌နေ (၈) ခွက်ထိ သောက်သုံးပေးသင့်ပါတယ်။

•  အရက်သေစာသောက်သုံးမှုကို ရှောင်ကြဉ်ပါ

အရက်သေစာ သောက်သုံးမှုကြောင့်လည်း ဆံပင်ကျွတ်ခြင်းဝေဒနာကို ခံစားရနိုင်ပါတယ်။ ဒါ့အပြင် အရက်အလွန်အကျွံ သောက်သုံးမှုကြောင့် ဆံပင်ပေါက်နှုန်းကို လျော့ကျစေနိုင်ပါတယ်။ ဒီတော့ ဆံပင်ကျွတ်ခြင်း ဝေဒနာကို မခံစားချင်တော့ဘူးဆိုရင် အရက်လျှော့သောက်တာပဲဖြစ်ဖြစ်၊ အရက်ဖြတ်လိုက်တာပဲဖြစ်ဖြစ် အမြန်ဆုံး လုပ်ဆောင်သင့်ပါတယ်။

• ဆေးလိပ်သောက်ခြင်းကို ရှောင်ကြဉ်ပါ

ဆေးလိပ်သောက်ခြင်းကြောင့်လည်း ဦးရေပြားကို ပို့လွှတ်နေတဲ့ သွေးပမာဏ လျော့နည်းသွားလေ့ရှိပြီး ဆံပင်ကျွတ်စေနိုင်ပါတယ်။

• နေ့စဉ်ပုံမှန်လေ့ကျင့်ခန်း လုပ်ဆောင်ပါ

တစ်နေ့ကို မိနစ်သုံးဆယ်ခန့် ပုံမှန်လေ့ကျင့်ခန်း လုပ်ဆောင်ပေးခြင်းဖြင့် ခန္ဓာကိုယ်အတွင်းမှ ဟော်မုန်းလယ်ဗယ်ကို မျှခြေမှာတည်ရှိနေအောင် လုပ်ဆောင်ပေးသွားမှာဖြစ်တဲ့အပြင် ဆံပင်မကျွတ်အောင်လည်း ကာကွယ်ပေးနိုင်မှာ ဖြစ်ပါတယ်။

• ဓာတုဗေဒဆိုးဆေးများ အသုံးပြုခြင်းကို ရှောင်ကြဉ်ပါ

ဆိုးဆေးတွေမှာ ပါဝင်တဲ့ ဓာတုဗေဒပစ္စည်းတွေကြောင့်လည်း ဆံပင်ကျွတ်ခြင်းဝေဒနာကို ခံစားရစေနိုင်ပါတယ်။ တကယ်လို့ သင့်အနေနဲ့ ဆံပင်တွေကျွတ်နေခဲ့မယ်ဆိုရင်တော့ ဆံပင်ဆိုးဆေးတွေ အသုံးပြုခြင်းကို တတ်နိုင်သမျှ ရှောင်ကြဉ်သင့်ပါတယ်။

REF: IndiaTimes