လက်ချောင်းလေးတွေ ထုံကျဥ်ကိုက်ခဲနေတာကို လူသားအများစု အနေနဲ့ ခံစားဖူးကြမယ် ထင်ပါတယ်။ လက်ချောင်းများ ထုံကျဥ်ခြင်းကို အားနည်းတဲ့ အခါမှာ၊ ထိခိုက်ဒဏ်ရာရတဲ့ အခါမှာ ခံစားရလေ့ ရှိသလို အချို့သော ကျန်းမာရေးဆိုင်ရာ ချို့ယွင်းချက်တွေကြောင့်လည်း ခံစားရလေ့ ရှိကြပါတယ်။ ဒါကြောင့် လက်ချောင်းများ ထုံကျဥ်ခြင်းကို ဖြစ်ပွားစေတဲ့ အကြောင်းအရင်းတွေကို အခုလို ဖော်ပြပေးလိုက်ရတာ ဖြစ်ပါတယ်။

• နှလုံးဖောက်ခြင်း

နှလုံးအဓိက သွေးလွှတ်ကြောတွေမှာ ပိတ်ဆို့မှုတွေ ဖြစ်ပွားလာတဲ့ အခါမျိုးတွေမှာ နှလုံးဖောက်ခြင်းကို ခံစားရလေ့ ရှိကြပါတယ်။ နှလုံးဖောက်ခြင်းကို ခံစားရတဲ့ အခါမှာ မူးဝေခြင်း၊ ချွေးထွက်လွန်ခြင်း၊ အသက်ရှူမဝခြင်း၊ ရင်ဘတ်အောင့်ခြင်း၊ မောပန်းနွမ်းနယ်ခြင်းစတဲ့ ဝေဒနာတွေကို ခံစားရနိုင်မှာဖြစ်သလို ခြေချောင်း၊ လက်ချောင်းများ ထုံကျဥ်ခြင်းကိုလည်း ခံစားရနိုင်ပါတယ်။

• လေဖြတ်ခြင်း

ဦးနှောက် အနေနဲ့ ပုံမှန် လုပ်ငန်းဆောင်တာတွေကို ဆောင်ရွက်နိုင်ဖို့ အတွက် လုံလောက်တဲ့ သွေးပမာဏ ပုံမှန် ရရှိဖို့ လိုအပ်ပါတယ်။ တကယ်လို့ ဦးနှောက်ရဲ့ အစိတ်အပိုင်းတွေကို အကြောင်းအမျိုးမျိုးကြောင့် လုံလောက်တဲ့ သွေးပမာဏ ရရှိခဲ့ခြင်း မရှိဘူးဆိုရင် ခန္ဓဦကိုယ်ရဲ့ လုပ်ငန်းဆောင်တာတွေကို ထိခိုက်စေမှာဖြစ်တဲ့အပြင် လေဖြတ်ဝေဒနာကို ခံစားရနိုင်ပါတယ်။ လေဖြတ်ဝေဒနာရဲ့ ရှေ့ပြေး လက္ခဏာတွေကတော့‌ အောက်ပါအတိုင်းပဲ ဖြစ်ပါတယ်။

• ကိုယ်တစ်ခြမ်း ထုံကျဥ်ကိုက်ခဲခြင်း
• စိတ်ရှုပ်ထွေးခြင်း
• အမြင်အာရုံ ဝေဝါးခြင်း
• စကားပြောရခက်ခဲခြင်း
• ခန္ဓာကိုယ်ဟန်ချက် ထိန်းရခက်ခဲခြင်း
• သွေးကြောများ ရောင်ရမ်းခြင်း (Vasculitis)

ခန္ဓာကိုယ် ခုခံအားစနစ် ဖောက်ပြန်ခြင်းကြောင့် သွေးကြောများ ရောင်ရမ်းတဲ့ အခါမှာလည်း မောပန်းနွမ်းနယ်ခြင်း၊ ဖျားနာခြင်း၊ ကိုယ်အလေးချိန်ကျဆင်းခြင်း၊ ချွေးထွက်လွန်ခြင်း၊ ခြေချောင်း၊ လက်ချောင်းများ ထုံကျဥ်ကိုက်ခဲခြင်းစတဲ့ ဝေဒနာတွေကို ခံစားရနိုင်ပါတယ်။

• ရေးနော့ရောဂါ (Raynaud’s Disease)

ရေးနော့ရောဂါ ဆိုတာကတော့ ခြေချောင်း၊ လက်ချောင်းတွေကို တိုက်ရိုက် သွေးပို့လွှတ်ပေးလျက်ရှိတဲ့ သွေးလွှတ်ကြောတွေ ကျဥ်းမြောင်းသွားခြင်းကြောင့် ခံစားရလေ့ရှိတဲ့ ရောဂါတစ်မျိုးပဲ ဖြစ်ပါတယ်။ ရေးနော့ရောဂါကို ခံစားရတဲ့ အခါမှာ ခြေချောင်း၊ လက်ချောင်းများ ထုံကျဥ်ခြင်း၊ အသားအရောင် ဖျော့တော့ခြင်းစတဲ့ ဝေဒနာတွေကို ခံစားရနိုင်ပါတယ်။

• ကျောရိုးမ ထိခိုက်ဒဏ်ရာရခြင်း

ကျောရိုးမ ထိခိုက်ဒဏ်ရာရခြင်းကို ခံစားရတဲ့ အခါမှာလည်း ခြေ၊ လက်များ ထုံကျဥ်ကိုက်ခဲခြင်းကို ခံစားရမှာ ဖြစ်ပါတယ်။ ဒါ့အပြင် ကျောရိုးမ ထိခိုက်ဒဏ်ရာရခြင်းကြောင့် လှုပ်ရှားရခက်ခဲခြင်း၊ ဆီးမထိန်းနိုင်ခြင်း၊ ဝမ်းမထိန်းနိုင်ခြင်း၊ ကျောရိုးတစ်ဝိုက် နာကျင်ကိုက်ခဲခြင်းစတဲ့ ဝေဒနာတွေကိုလည်း ခံစားရနိုင်ပါတယ်။

• လည်ပင်းကျီးပေါင်းတက်ခြင်း (Cervical Spondylosis)

လည်ပင်းကျီးပေါင်းတက်ခြင်း ဆိုတာကတော့ လည်ပင်းတစ်ဝိုက် အဆစ်တွေ၊ အချပ်ပြားတွေ ယိုယွင်းလာခြင်းကြောင့် ခံစားရလေ့ရှိတဲ့ ရောဂါတစ်မျိုးပဲ ဖြစ်ပါတယ်။ လည်ပင်းကျီးပေါင်းတက်ခြင်းကို ခံစားရတဲ့ အခါမှာ ကြွက်သားများ အားနည်းခြင်း၊ လက်ချောင်းများ ထုံကျဥ်ကိုက်ခဲခြင်း၊ လက်ချောင်းများ နာကျင်ခြင်း၊ ဆီးမထိန်းနိုင်ခြင်း၊ မကြာခဏ ဆီးသွားချင်စိတ် ဖြစ်ပွားခြင်း၊ လှုပ်ရှားသွားလာရ ခက်ခဲခြင်းစတဲ့ ဝေဒနာတွေကို ခံစားရနိုင်ပါတယ်။

REF: MedicalNewsToday