အစာအိမ်မာခြင်း/ အစာအိမ်ရောင်ရမ်းခြင်းကို များသောအားဖြင့် အစားအစာတွေ အလွန်အကျွံ စားသုံးလိုက်တဲ့ အခါမှာ ဒါမှမဟုတ် ကာဘိုဟိုက်ဒရိတ် ပါဝင်တဲ့ အချိုရည်တွေ သောက်သုံးတဲ့ အခါမှာ ခံစားရလေ့ ရှိကြပါတယ်။ ဒါ့အပြင် တစ်ခါတရံမှာ အချို့သော ဝေဒနာတွေ ခံစားနေရခြင်းကြောင့်လည်း အစာအိမ်မာခြင်းကို ခံစားရလေ့ ရှိကြပါတယ်။

အစာအိမ်မာခြင်းကို ဖြစ်ပွားစေတဲ့ အကြောင်းအရင်းတွေကတော့ အောက်ပါအတိုင်းပဲ ဖြစ်ပါတယ်။

• ကာဘိုဟိုက်ဒရိတ် ပါဝင်တဲ့ အချိုရည်များ သောက်သုံးခြင်း

ကာဘိုဟိုက်ဒရိတ် ပါဝင်တဲ့ အချိုရည်တွေ အလွန်အကျွံ သောက်သုံးတဲ့ အခါမှာ ဗိုက်ထဲမှာ ‌တောင့်တောင့်ကြီး ဖြစ်နေတဲ့ ခံစားချက်မျိုးကို ခံစားရမှာ ဖြစ်သလို ဗိုက်အောင့်ခြင်းကိုလည်း ခံစားရမှာ ဖြစ်ပါတယ်။

• အစာအစားများ အလွန်အကျွံ စားသုံးခြင်း

အစားအစာတွေ အလွန်အကျွံ စားသုံးတဲ့ အခါမှာ ဒါမှမဟုတ် အလျင်အမြန် စားသုံးတဲ့ အခါမှာလည်း အစာအိမ်မာခြင်း၊ ဗိုက်အောင့်ခြင်းကို ခံစားရနိုင်ပါတယ်။ ဒါပေမယ့် အစာအိမ် အတွင်းကို ဝင်ရောက်လာတဲ့ အစားအစာတွေကို အစာချေစနစ်က ချေဖျက်ပြီးသွားတဲ့ အခါမှာတော့ ခံစားနေရတဲ့ ဝေဒနာတွေလည်း သက်သာ ပျောက်ကင်းသွားမှာ ဖြစ်ပါတယ်။

• ဝမ်းချုပ်ခြင်း

အူသိမ်အူမ လှုပ်ရှားမှု အပိုင်းမှာ အနှောင့်အယှက်တွေ ရှိနေတဲ့ အခါမှာ ဝမ်းချုပ်ခြင်းကို ခံစားရလေ့ ရှိကြပါတယ်။ ဝမ်းချုပ်ခြင်းကို ခံစားရတဲ့ အခါမှာလည်း လေပွခြင်း၊ အစာအိမ်မာခြင်း၊ ဗိုက်တင်းခြင်းစတဲ့ ဝေဒနာတွေကို ခံစားရမှာ ဖြစ်ပါတယ်။

• အစားအစာနဲ့ ဓာတ်မတည့်ခြင်း

အချို့သော အစားအစာတွေနဲ့ ဓာတ်မတည့်တဲ့ အခါမျိုးတွေမှာလည်း လေပွခြင်း၊ အစာအိမ်ရောင်ခြင်း၊ အစာအိမ်မာခြင်းစတဲ့ ဝေဒနာတွေကို ခံစားရနိုင်ပါတယ်။

• အူလမ်းကြောင်းဆိုင်ရာ ရောဂါများ ခံစားနေရခြင်း (Irritable Bowel Syndrome)

အူလမ်းကြောင်းဆိုင်ရာ ရောဂါတွေ ခံစားရတဲ့ အခါမှာ အစာအိမ်မာခြင်းကို ခံစားရမှာ ဖြစ်တဲ့အပြင် ဗိုက်အောင့်ခြင်း၊ လေချဥ်တက်ခြင်း၊ လေပွခြင်း၊ အစာအိမ်နာခြင်းစတဲ့ ဝေဒနာတွေကိုလည်း ခံစားရမှာ ဖြစ်ပါတယ်။

• အူ‌ရောင်ရောဂါများ ခံစားနေရခြင်း (Inflammatory Bowel Disease)

အူရောင်ရောဂါတွေဖြစ်တဲ့ အစာချေလမ်းကြောင်းမှာ အနာပေါက်ခြင်း (Ulcerative Colitis) ၊ ခရုန်းရောဂါ (Crohn’s Disease) စတဲ့ ဝေဒနာတွေ ခံစားရတဲ့ အခါမှာလည်း အစာအိမ်အောင့်ခြင်း၊ အစာအိမ်နာခြင်း၊ အစာအိမ်မာခြင်းစတဲ့ ဝေဒနာတွေကို ခံစားရနိုင်ပါတယ်။

• ကိုယ်ဝန်ရှိခြင်း

ကိုယ်ဝန်ဆောင်နေစဥ် ကာလမှာ သားအိမ်ကြီးလာတာနဲ့အမျှ အစာအိမ်အပေါ်ကို ဖိထားသလို ဖြစ်တာကြောင့် အစာအိမ်မာခြင်းကို ခံစားရလေ့ ရှိကြပါတယ်။

သင့်အနေနဲ့ အစာအိမ်မာခြင်း၊ အစာအိမ်‌ရောင်ခြင်းကို ရက်သတ္တပတ် အနည်းငယ်ခန့် ခံစားနေရတဲ့အပြင် -

• သွေးဝမ်းသွားခြင်း
• အသက်ရှူမဝခြင်း
• အစာအိမ်နာခြင်း
• မူးဝေခြင်း
• အော့အန်ခြင်း
• ကိုယ်အလေးချိန် အလွန်အမင်း ကျဆင်းခြင်း
• အသားဝါခြင်းစတဲ့ ဝေဒနာတွေကိုပါ ခံစားနေရမယ်ဆိုရင်တော့ သက်ဆိုင်ရာ ဆရာဝန်နဲ့ အမြန်ဆုံး သွားရောက် ပြသပြီး စမ်းသပ်စစ်ဆေးမှုတွေ ခံယူသင့်ပါတယ်။

REF: HealthLine