သွားပြည်တည်ခြင်း ဆိုတာကတော့ ဘက်တီးရီးယားပိုး ကူးစက်ခြင်းကြောင့် သွားဖုံး ဒါမှမဟုတ် သွားမှာ ပြည်တည်ခြင်းကို ဆိုလိုတာပဲ ဖြစ်ပါတယ်။ သွားပြည်တည်ခြင်းကြောင့် ပြင်းထန်တဲ့ နာကျင်မှုတွေကို ခံစားရနိုင်သလို တစ်ခါတရံမှာ နားကိုက်ခြင်း၊ လည်ပင်းနာခြင်းစတဲ့ ဝေဒနာတွေကိုပါ ခံစားရနိုင်ပါတယ်။ ဒါ့အပြင် သွားပြည်တည်ခြင်းကို သက်သာ ပျောက်ကင်း‌အောင် ကုသခဲ့ခြင်း မရှိဘူးဆိုရင် အသက် အန္တရာယ်ကို ထိခိုက်စေနိုင်တာကြောင့် သွားပြည်တည်ခြင်းကို ခံစားနေရမယ်ဆိုရင် ပေါ့ဆမနေသင့်ပဲ အမြန်ဆုံး ကုသမှု ခံယူသင့်ပါတယ်။

သွားပြည်တည်ခြင်း (Abscessed Tooth) ကို အမျိုးအစားအားဖြင့် သုံးမျိုးခွဲခြား သတ်မှတ်နိုင်မှာ ဖြစ်ပါတယ်။

• သွားအရင်းမှာ ပြည်တည်ခြင်း (Periapical Abscess)
• သွားနဲ့သွားဖုံး အကြားမှာ ပြည်တည်ခြင်း (Periodontal Abscess)
• သွားဖုံးပြည်တည်ခြင်း (Gingival Abscess)

သွားပြည်တည်ခြင်းကို ခံစားနေရပြီဖြစ်ကြောင်း အလွယ်တကူ သိရှိနိုင်တဲ့ အချက်ကတော့ သွားဖုံးနာခြင်း၊ သွားကိုက်ခြင်းတို့ပဲ ဖြစ်ပါတယ်။ ဒါ့အပြင် သွားပြည်တည်ခြင်းကြောင့် -

• နား၊ မေးရိုး၊ လည်ပင်း နာကျင်ခြင်း
• အစာစားတိုင်း သွားကိုက်ခြင်း
• ပါးစောင် ယောင်ယမ်းခြင်း
• သွားကျိုးခြင်း
• သွားပဲ့ခြင်း
• ပါးစပ်ဖွင့်ရ ခက်ခဲခြင်း
• အိပ်မပျော်ခြင်း
• ခံတွင်းအနံ့ဆိုးထွက်ခြင်း
• ခံတွင်းပျက်ခြင်း
• သွားဖုံး ယောင်ယမ်းခြင်း
• လည်ပင်း ဒါမှမဟုတ် မေးရိုးများ ယောင်ယမ်းခြင်း
• ဖျားနာခြင်းစတဲ့ ဝေဒနာတွေကို ခံစားရနိုင်ပါတယ်။

တကယ်လို့ သင့်အနေနဲ့ အထက်မှာ ဖော်ပြထားတဲ့ ရောဂါဝေဒနာတွေအပြင် အဖျားကြီးခြင်း၊ အစာစားဖို့ ခက်ခဲခြင်း၊ နှလုံးခုန်မြန်ခြင်း၊ စိတ်ဇဝေဇဝါဖြစ်ခြင်းစတဲ့ ဝေဒနာတွေကို ခံစားနေရမယ် ဆိုရင်တော့ သက်ဆိုင်ရာ ဆရာဝန်နဲ့ အမြန်ဆုံး သွားရောက်ပြသသင့်ပါတယ်။

ဒါ့အပြင် ပြည်တည်နာတွေ ပေါက်သွားတဲ့ အခါမှာ အလွန်အမင်း နာကျင်ခြင်းကို ခံစားရမှာ ဖြစ်တဲ့အပြင် ပြည်ပုပ်တွေ ပါးစပ်ထဲကနေ ထွက်လာမှာ ဖြစ်တာကြောင့် ဆိုးဝါးတဲ့ အရသာတွေကို ခံစားရမှာ ဖြစ်ပါတယ်။

သွားပြည်တည်ခြင်းကို အဓိက ဖြစ်ပွားစေတဲ့ အကြောင်းအရင်းကတော့ ဘက်တီးရီးယားပိုး ကူးစက်ခြင်းကြောင့်ပဲ ဖြစ်ပါတယ်။ ဒါ့အပြင် သွားပြည်တည်ခြင်း အမျိုးအစားအပေါ် မူတည်ပြီး ဖြစ်ပွားစေတဲ့ အကြောင်းအရင်းတွေလည်း တူညီနိုင်မှာ မဟုတ်ပါဘူး။

သွားပိုးစားခြင်း ဒါမှမဟုတ် သွားအ‌ပေါက်ဖြစ်ခြင်းတို့ကနေ တစ်ဆင့် ဘက်တီးရီးယားပိုးတွေ ဝင်ရောက်လာပြီး သွားအပေါ်ယံ ကြွေသွားလွှာအောက်မှာ တည်ရှိနေတဲ့ ပျော့ပျောင်းနေတဲ့ တစ်သျှူးတွေကို ဖျက်ဆီးပစ်တဲ့ အခါမှာ သွားအရင်းမှာ ပြည်တည်ခြင်းကို ဖြစ်ပွားစေနိုင်ပါတယ်။

တကယ်လို့ ဘက်တီးရီးယားပိုးတွေ သွားဖုံးကို ကူးစက်သွားတဲ့ အခါမျိုးတွေမှာ သွားဖုံးရောဂါကို ဖြစ်ပွားစေနိုင်ပါတယ်။ သွားဖုံးရောဂါကို ခံစားရတဲ့ အခါမှာ သွားဖုံးယောင်ယမ်းခြင်းကို ဖြစ်ပွားစေမှာ ဖြစ်တဲ့အပြင် သွားဖုံးနဲ့ သွားအရင်း အကြားမှာ ပြည်တည်ခြင်းကိုလည်း ဖြစ်ပွားစေနိုင်ပါတယ်။

ပြောင်းဖူးဆံတွေ၊ သွားတိုက်တံအမွေးတွေ သွားဖုံးမှာ တွယ်ငြိနေခြင်းကြောင့် သွားဖုံးကို ဒဏ်ရာအနာတရတွေ ဖြစ်ပွားစေနိုင်တဲ့အပြင် သွားဖုံး ပြည်တည်ခြင်းကိုလည်း ဖြစ်ပွားစေနိုင်ပါတယ်။

သွားပြည်တည်ခြင်းကို ကုသနိုင်မယ့် နည်းလမ်းတွေကတော့ အောက်ပါအတိုင်းပဲ ဖြစ်ပါတယ်။

• ပြည်များကို စုပ်ထုတ်ခြင်း

သွားအတွင်း ပြည်တည်နေတဲ့ နေရာကို အနည်းငယ် ခွဲစိတ်ပြီး ပြည်များကို စုပ်ထုပ်ခြင်းဖြင့် သွားပြည်တည်ခြင်းကို သက်သာ ပျောက်ကင်းစေမှာ ဖြစ်ပါတယ်။ ဒါပေမယ့် ပြည်များကို စုပ်ထုတ်ပြီးတဲ့ အခါမှာ သွားသန့်ဆေးရည်ကို အသုံးပြုပြီး ခံတွင်းကို သန့်ရှင်းရေး ပြုလုပ်ပေးဖို့ လိုအပ်မှာ ဖြစ်ပါတယ်။

• သွားနှုတ်ခြင်း

သွားအတွင်း ပြည်တည်ခြင်းကြောင့် သွားတစ်ချောင်းလုံး ပျက်စီးသွားတဲ့ အခါမှာ ပြည်တည်နေတဲ့ နေရာကို စုပ်ထုတ်ပစ်ဖို့ အတွက် ပျက်စီးနေတဲ့သွားကို အရင်ဆုံး ဖယ်ရှားပစ်ဖို့ လိုအပ်ပါတယ်။

• ပိုးသတ်ဆေးများ သောက်သုံးခြင်း

တကယ်လို့ သွားအတွင်း ပြည်တည်ခြင်းအပြင် ပါးစောင် အတွင်းမှာ ဘက်တီးရီးယားပိုးတွေ ပျံ့နှံ့နေခဲ့မယ်ဆိုရင် ဆရာဝန် ညွှန်ကြားချက်အတိုင်း ပိုးသတ်ဆေးတွေ သောက်သုံးပေးခြင်းဖြင့် ဘက်တီးရီးယားပိုးတွေကို ဖယ်ရှားပစ်နိုင်မှာ ဖြစ်တဲ့အပြင် ပြည်တည်ခြင်းကိုလည်း သက်သာပျောက်ကင်းစေမှာ ဖြစ်ပါတယ်။

တကယ်လို့ သွားပြည်တည်ခြင်း ဖြစ်ပွားမှုကို ကာကွယ်ချင်တယ် ဆိုရင်တော့ အောက်ပါနည်းလမ်းတွေကို လိုက်နာ ဆောင်ရွက်သင့်ပါတယ်။

• အပူလွန်၊ အအေးလွန် အစားအစာများ စားသုံးမှုကို ရှောင်ကြဉ်ခြင်း
• ဖလိုရိုက် ပါဝင်တဲ့ သောက်ရေကို သောက်သုံးပေးခြင်း
• သွားပုံမှန် တိုက်ပေးခြင်း
• ပျော့ပျောင်းတဲ့ သွားတိုက်တံကို အသုံးပြုခြင်း
• အသီးအနှံများ စားသုံးပေးခြင်း
• ပါးစပ်ဆေးရည်ဖြင့် ပါးစပ်ကို ဆေးကြောပေးခြင်း

REF: MayoClinic, HealthLine, MedicalNewsToday