ဆီးထဲသွေးပါခြင်းကို ဖြစ်ပွားစေတဲ့ အကြောင်းအရင်းပေါင်းများစွာ တည်ရှိနေပါတယ်။ ရောဂါပိုးကူးစက်ခြင်း၊ ကျောက်ကပ်ဝေဒနာ ခံစားနေရခြင်း၊ ကင်ဆာရောဂါ ဖြစ်ပွားနေခြင်း၊ သွေးရောဂါများ ခံစားနေရခြင်းတို့ကြောင့် ဆီးထဲသွေးပါခြင်းကို ဖြစ်ပွားစေနိုင်ပါတယ်။ ဒါ့အပြင် ဆီးထဲသွေးပါခြင်းကို ဂရုတစိုက် ကုသခဲ့ခြင်း မရှိဘူးဆိုရင် ကျန်းမာရေးဆိုင်ရာ ဆိုးကျိုးပေါင်းများစွာကို ခံစားရမှာ ဖြစ်ပါတယ်။

ဆီးထဲသွေးပါခြင်းကို အမျိုးအစားအားဖြင့် နှစ်မျိုးခွဲခြား သတ်မှတ်နိုင်မှာ ဖြစ်ပါတယ်။

• Gross Hematuria

ဆီးသွားလိုက်တဲ့အခါ ထွက်ရှိလာတဲ့ ဆီးအရည်တွေထဲမှာ သွေးစသွေးနတွေ ပါဝင်နေခြင်းကို လူမျက်စိနဲ့ မြင်တွေ့နိုင်ပါက Gross Hematuria ကိုခံစားနေရပြီဖြစ်ကြောင်း သတ်မှတ်နိုင်မှာ ဖြစ်ပါတယ်။

• Microscopic Hematuria

ဆီးအရည်ထဲမှာ တည်ရှိနေတဲ့ သွေးစသွေးနတွေကို မိုက်ခရိုစကုပ် (Microscope) ဖြင့်ကြည့်ရှုမှသာ မြင်တွေ့နိုင်ပါက Microscopic Hematuria ဝေဒနာကို ခံစားနေရပြီ ဖြစ်တယ်လို့ သတ်မှတ်နိုင်မှာ ဖြစ်ပါတယ်။

ဆီးထဲပိုးဝင်ခြင်းကို ခံစားရတဲ့ အခါမှာ -

• အနီရောင်၊ ပန်းရောင် ဆီးအရည်များသွားခြင်း
• မကြာခဏ ဆီးသွားခြင်း
• ဆီးသွားဖို့ခက်ခဲခြင်း
• အစာအိမ်အောင့်ခြင်း
• ခြေလက်များ ရောင်ရမ်းခြင်းစတဲ့ ဝေဒနာတွေကို ခံစားရနိုင်ပါတယ်။

ဆီးထဲသွေးပါခြင်း (Hematuria) ကို ဖြစ်ပွားစေတဲ့ အကြောင်းအရင်းတွေကတော့ အောက်ပါအတိုင်းပဲ ဖြစ်ပါတယ်။

• ရောဂါပိုးကူးစက်ခြင်း

ဆီးထဲသွေးပါခြင်းကို အဓိက ဖြစ်ပွားစေတဲ့ အကြောင်းအရင်းကတော့ ရောဂါပိုး ကူးစက်ခြင်းကြောင့်ပဲ ဖြစ်ပါတယ်။ ဆီးလမ်းကြောင်း ပိုးဝင်ခြင်း၊ ဆီးအိမ်ပိုးဝင်ခြင်း၊ ကျောက်ကပ်မှာ ရောဂါပိုး ကူးစက်ခြင်းတို့ကို ခံစားရတဲ့အခါမှာ ဆီးထဲသွေးပါခြင်းကို ခံစားရမှာ ဖြစ်ပါတယ်။

• ကျောက်တည်ခြင်း

ဆီးအိမ် ဒါမှမဟုတ် ကျောက်ကပ်မှာ ကျောက်တည်ခြင်းကို ခံစားရတဲ့ အခါမှာလည်း ဆီးထဲသွေးပါခြင်းကို ဖြစ်ပွားစေနိုင်ပါတယ်။ ခန္ဓာကိုယ်အတွက် မလိုအပ်တဲ့ သတ္တုဓာတ်တွေကို ဆီးသွားခြင်းအဖြစ် ခန္ဓာကိုယ်ကနေ စွန့်ထုတ်လိုက်ပေမယ့် ခန္ဓာကိုယ်အတွင်းမှာ အကြွင်းအကျန် အနည်းငယ် ကျန်ရှိနေပြီး သတ္တုအစိုင်အခဲတွေ ဖြစ်ပွားသွားတဲ့ အခါမှာ ကျောက်တည်ခြင်းကို ခံစားရနိုင်ပါတယ်။

• ဆီးကျိတ် ကြီးထွားလာခြင်း (Enlarged Prostate)

လူလတ်ပိုင်းအရွယ် အမျိုးသားတွေနဲ့ သက်ကြီးရွယ်အိုတွေ အနေနဲ့ ဆီးကျိတ် ကြီးထွားခြင်းကို ခံစားရလေ့ ရှိကြပါတယ်။ ဆီးကျိတ် ကြီးထွားလာတဲ့ အခါမှာ ဆီးအိမ်ကို ဖိထားသလို ဖြစ်သွားတာကြောင့် ဆီးသွားရာမှာ အခက်အခဲတွေနဲ့ ရင်ဆိုင်ရမှာ ဖြစ်တဲ့အပြင် ဆီးထဲသွေးပါခြင်းကိုလည်း ဖြစ်ပွားစေနိုင်ပါတယ်။

• ကျောက်ကပ်ဝေဒနာ ခံစားနေရခြင်း

တစ်ခါတရံမှာ ကျောက်ကပ်ရောင်ခြင်း၊ ကျောက်ကပ်မှာ ရောဂါပိုးကူးစက်ခြင်းတို့ကြောင့်လည်း ဆီးထဲသွားပါခြင်းကို ဖြစ်ပွားစေနိုင်ပါတယ်။

• ကင်ဆာရောဂါ ဖြစ်ပွားခြင်း

ဆီးအိမ်ကင်ဆာ၊ ကျောက်ကပ်ကင်ဆာ၊ ဆီးကျိတ်ကင်ဆာစတဲ့ ရောဂါတွေကို ခံစားရတဲ့ အခါမှာလည်း ဆီးထဲသွေးပါခြင်းကို ဖြစ်ပွားစေနိုင်ပါတယ်။

တစ်ခါတရံမှာ သွေးကျဲဆေးတွေ၊ ကင်ဆာဆေးတွေ၊ အကိုက်အခဲပျောက်ဆေးတွေ သောက်သုံးရခြင်းကြောင့်လည်း ဆီးထဲသွေးပါခြင်းကို ဖြစ်ပွားစေနိုင်ပါတယ်။ ဒ့ါအပြင် သွေးရောဂါများ ဖြစ်ပွားခြင်း၊ လေ့ကျင့်ခန်းအပြင်းအထန် လုပ်ဆောင်ခြင်းတို့ကြောင့်လည်း ဆီးထဲသွေးပါခြင်းကို ဖြစ်ပွားစေနိုင်ပါတယ်။

တကယ်လို့ သင့်အနေနဲ့ ဆီးထဲသွေးပါခြင်းကို ခံစားနေရတဲ့အပြင် -

• မူးဝေခြင်း
• အော့အန်ခြင်း
• ဖျားနာခြင်း
• ချမ်းတုန်ခြင်း
• ကျောနာခြင်းစတဲ့ ဝေဒနာတွေကိုပါ ခံစားနေရမယ် ဆိုရင်တော့ သက်ဆိုင်ရာ ဆရာဝန်နဲ့ အမြန်ဆုံး သွားရောက် ပြသသင့်ပါတယ်။

REF: HealthLine