နားထင်နာခြင်းဆိုတာကတော့ အဖြစ်များတဲ့ ရောဂါတစ်မျိုးပဲ ဖြစ်ပါတယ်။ နားထင်နာခြင်းကို စိတ်ဖိစီးမှုတွေများတဲ့ အခါမျိုးတွေမှာ ဒါမှမဟုတ် စိုးရိမ်ပူပန်မှုတွေများတဲ့ အခါမျိုးတွေမှာ များသောအားဖြင့် ခံစားရလေ့ ရှိကြပါတယ်။ ဒါ့အပြင် အချို့သော အ‌ခြေအနေတွေမှာ ကျန်းမာ‌ရေးဆိုင်ရာ ပြဿနာတွေ ခံစားရခြင်းကြောင့်လည်း နားထင်နာခြင်းကို ခံစားရလေ့ ရှိကြပါတယ်။  ဒါကြောင့် နားထင်နာခြင်းကို ဖြစ်ပွားတေစဲ့ အကြောင်းအရင်းတွေကို အခုလို ဖော်ပြပေးလိုက်ရတာ ဖြစ်ပါတယ်။

• တင်းအားများ ခေါင်းကိုက်ခြင်း (Tension Headaches)

တင်းအားများ ခေါင်းကိုက်ခြင်းကို ခံစားရတဲ့ အခါမှာ ဦးခေါင်းနဲ့ လည်ပင်းတစ်ဝိုက် ကြွက်သားများ တင်းမာခြင်း၊ နားထင်နာခြင်းစတဲ့ ဝေဒနာတွေကို ခံစားရနိုင်ပါတယ်။ အခြားသော ခေါင်းကိုက်ခြင်းတွေနဲ့ မတူတဲ့ အချက်ကတော့ တင်းအားများ ခေါင်းကိုက်ခြင်းကို ခံစားရတဲ့ အခါမှာ မူးဝေခြင်း၊ အော့အန်ခြင်းတို့ကို ခံစားရမှာ မဟုတ်ပါဘူး။

• ခေါင်းတစ်ခြမ်းကိုက်ခြင်း (Migraine)

ခေါင်းတစ်ခြမ်းကိုက်ခြင်းကို စတင်ခံစားရခြင်းကြောင့်လည်း အချို့သော လူပုဂ္ဂိုလ်တွေမှာ နားထင်တစ်ဝိုက် နာကျင်ခြင်း၊ ကိုက်ခဲခြင်းစတဲ့ ဝေဒနာတွေကို ခံစားနိုင်ပါတယ်။

• လည်ပင်းခေါင်းကိုက်ခြင်း (Cervicogenic Headache)

လည်ပင်းခေါင်းကိုက်ခြင်းဆိုတာကတော့ လည်ပင်းရိုး မူမမှန်ခြင်း၊ လည်ချောင်းမှာ ဒဏ်ရရခြင်း၊ လည်ပင်းရိုး ရောင်ရမ်းခြင်းတို့ကြောင့် ဖြစ်ပွားလေ့ရှိတဲ့ ခေါင်းကိုက်ဝေဒနာ တစ်မျိုးပဲ ဖြစ်ပါတယ်။ လည်ပင်းခေါင်းကိုက်ခြင်းကို ခံစားရတဲ့အခါမှာ -

• ခေါင်းတစ်ခြမ်းကိုက်ခြင်း
• လည်ချောင်းနာခြင်း
• မူးဝေခြင်း
• မိုက်ခနဲဖြစ်ခြင်း
• လည်ပင်းလှုပ်ရှားရ ခက်ခဲခြင်း
• နားထင်နာခြင်းစတဲ့ ဝေဒနာတွေကို ခံစားရနိုင်ပါတယ်။

• သွေးကြောကြီးများ ရောင်ရမ်းခြင်း (Giant Cell Arteritis)

သွေးကြောကြီးများ ရောင်ရမ်းခြင်း ဆိုတာကတော့ ခန္ဓာကိုယ်အတွင်းမှ သွေးလွှတ်ကြောများ ရောင်ရမ်းခြင်းကို ဆိုလိုတာပဲ ဖြစ်ပါတယ်။ သွေးကြောကြီးများ ရောင်ရမ်းခြင်းကို ခံစားရတဲ့ အခါမှာ -

• မောပန်းနွမ်းနယ်ခြင်း
• ခေါင်းကိုက်ခြင်း
• နားထင်နာကျင်ခြင်း
• မေးရိုးများ နာကျင်ခြင်း
• ဖျားနာခြင်း
• အစာစားချင်စိတ် မရှိခြင်း
• ကိုယ်အလေးချိန်ကျဆင်းခြင်း
• အမြင်အာရုံဝေဝါးခြင်းစတဲ့ ဝေဒနာတွေကို ခံစားရနိုင်ပါတယ်။

• အပျော့စား ဦး‌နှောက်ဒဏ်ရာရခြင်း (Mild Traumatic Brain Injury)

အပျော့စား ဦးနှောက်မှာ ဒဏ်ရာရခြင်းကို ခံစားရတဲ့ အခါမှာ ဦးခေါင်းတစ်ဝိုက် နာကျင်ကိုက်ခဲခြင်းကို ခံစားရမှာ ဖြစ်တာကြောင့် နားထင် နာကျင်ခြင်းကိုလည်း ခံစားရနိုင်ပါတယ်။

• ဦးနှောက်သွေးကြောဖောင်းခြင်း (Cerebral Aneurysm)

ဦးနှောက်သွေးကြောဖောင်းခြင်း ဆိုတာကတော့ ဦးနှောက်အတွင်းမှာ တည်ရှိနေတဲ့ သွေးကြောနံရံတွေ ဖောင်းလာခြင်းကို ဆိုလိုတာပဲ ဖြစ်ပါတယ်။ ဦးနှောက်သွေးကြောဖောင်းခြင်းကို ခံစားရတဲ့အခါမှာ -

• မူးဝေခြင်း
• အလင်းဒဏ် မခံနိုင်ခြင်း
• မျက်လုံးအောင့်ခြင်း
• လည်ပင်းနာခြင်း
• အော့အန်ခြင်း
• ခေါင်းကိုက်ခြင်း
• နားထင်တစ်ဝိုက် နာကျင်ခြင်းစတဲ့ ဝေဒနာတွေကို ခံစားရနိုင်ပါတယ်။

REF: MedicalNewsToday