တီဘီရောဂါဆိုတာကတော့ အဆုတ်မှာ ဖြစ်ပွားလေ့ရှိတဲ့ ဘက်တီးရီးယားပိုး ကူးစက်ရောဂါ တစ်မျိုးပဲ ဖြစ်ပါတယ်။ ဒါ့အပြင် တီဘီရောဂါဆိုတာ လူ့အသက်အန္တရာယ်ကို ဒုက္ခအပေးနိုင်ဆုံး ကူးစက်ရောဂါတွေထဲမှာ တစ်ခုအပါအဝင်ပဲ ဖြစ်ပါတယ်။ တီဘီရောဂါကို ဖြစ်ပွားစေတဲ့ ဘက်တီးရီးယားပိုးကတော့ (Mycobacterium Tuberculosis) ရောဂါပိုးကြောင့်ပဲ ဖြစ်ပါတယ်။

Mycobacterium Tuberculosis ရောဂါပိုးအနေနဲ့ အဆုတ်တစ်သျှူးများကို ဖျက်စီးပစ်လိုက်ခြင်းကြောင့် တီဘီရောဂါကို ခံစားရတာပဲ ဖြစ်ပါတယ်။ ဒါ့အပြင် တီဘီရောဂါကို ချောင်းဆိုးခြင်း၊ နှာချေခြင်း၊ စကားပြောခြင်း၊ သီချင်းဆိုခြင်းတို့ကနေ တစ်ဆင့် အလွယ်တကူ ကူးစက်နိုင်ပါတယ်။

တီဘီရောဂါကို ဖြစ်ပွားစေတဲ့ အကြောင်းအရင်းတွေကတော့ အောက်ပါအတိုင်းပဲ ဖြစ်ပါတယ်။

• ဆီးချိုရောဂါ ဖြစ်ပွားဖူးခြင်း
• ကျောက်ကပ်ဝေဒနာ ဖြစ်ပွားဖူးခြင်း
• ကင်ဆာရောဂါများ ဖြစ်ပွားဖူးခြင်း
• အာဟာရဓာတ် ပြည့်ဝမှုမရှိခြင်း
• ဆေးလိပ်အလွန်အကျွံ သောက်သုံးခြင်း
• ဆေးရွက်ကြီး သုံးစွဲခြင်း
• အဆစ်အမြစ်ရောင် လေးဖက်နာ‌ရောဂါ (Rheumatoid Arthritis) ဖြစ်ပွားဖူးခြင်း
• ခရုန်းရောဂါ (Crohn’s Disease) ဖြစ်ပွားဖူးခြင်း
• ခုခံအားကျဆင်းမှု ကူးစက်ရောဂါ ခံစားနေရခြင်း
• အရေပြားလေးဖက်နာရောဂါ (Lupus) ဖြစ်ပွားဖူးခြင်း

ဒါ့အပြင် အရှေ့တောင်အာရှ၊ အာဖရိက၊ အာဖဂန်နစ္စတန်၊ တရုတ်၊ ရုရှား၊ တောင်အမေရိက၊ အနောက်ပစိဖိတ်စတဲ့ ဒေသတွေမှာ နေထိုင်သူတွေ အနေနဲ့ တီဘီရောဂါကို အခြားသော နေရာဒေသတွေမှာ နေထိုင်သူတွေထက် ပိုမိုခံစားရလေ့ ရှိကြပါတယ်။

တီဘီရောဂါကို ခံစားရတဲ့ အခါမှာ -

• ဖျားနာခြင်း
• အားနည်းခြင်း
• ပင်ပန်းနွမ်းနယ်ခြင်း
• ချွေးထွက်လွန်ခြင်း
• ချောင်းဆိုးခြင်း
• ရင်ဘတ်အောင့်ခြင်း
• အစာစားချင်စိတ်မရှိခြင်း
• ကိုယ်အလေးချိန် ကျဆင်းခြင်းစတဲ့ ဝေဒနာတွေကို ခံစားရနိုင်ပါတယ်။

တကယ်လို့ သင့်အနေနဲ့ အထက်မှာ ဖော်ပြထားတဲ့ ရောဂါတွေကို ရက်သတ္တပတ် အနည်းငယ် ကြာမြင့်တဲ့အထိ ခံစားနေရတဲ့အပြင် ချောင်းဆိုးရာမှာ သွေးပါခြင်းကိုပါ ခံစားလာရပြီ ဆိုရင်တော့ သက်ဆိုင်ရာ ဆရာဝန်နဲ့ သွားရောက်ပြသပြီး တီဘီရောဂါ ဖြစ်ပွားနေခြင်း ရှိမရှိကို အမြန်ဆုံး စမ်းသပ် စစ်ဆေးသင့်ပါတယ်။

တီဘီရောဂါကို ပျောက်ကင်းအောင် ကုသခဲ့ခြင်း မရှိဘူးဆိုရင် တီဘီရောဂါပိုးအနေနဲ့ အဆုတ်ထဲကနေ တစ်ဆင့် အခြားသော ခန္ဓာကိုယ် အစိတ်အပိုင်းတွေကို ကူးစက်သွားနိုင်တာကြောင့် မလိုလားအပ်တဲ့ ဘေးထွက် ဆိုးကျိုးတွေကို ခံစားရမှာ ဖြစ်ပါတယ်။

တီဘီရောဂါကို ပျောက်ကင်းအောင် ကုသခဲ့ခြင်း မရှိဘူးဆိုရင် -

• ဦးနှောက်အမြှေးရောင်ရောင်ဂါ (Meningitis)
• နောက်ကျောရိုးမကြီး နာကျင်ခြင်း
• အဆစ်အမြစ်များ နာကျင်ကိုက်ခဲခြင်း
• အသည်းပျက်စီးခြင်း
• ကျောက်ကပ်ပျက်စီးခြင်းစတဲ့ ဝေဒနာတွေကို ခံစားရနိုင်ပါတယ်။

လက်ရှိအချိန်မှာ တီဘီရောဂါအတွက် ဆေးဝါးတွေ ပေါ်ပေါက်နေပြီ ဖြစ်တာကြောင့် ဆရာဝန် ညွှန်ကြားချက်အတိုင်း တီဘီဆေးတွေ သောက်သုံးပေးခြင်းဖြင့် အလွယ်တကူ သက်သာပျောက်ကင်းနိုင်မှာ ဖြစ်ပါတယ်။

REF: HealthLine, MedicalNewsToday