မွေးဖွားလာတဲ့ ကလေးငယ် အနေနဲ့  ကိုယ်အလေးချိန် (၂.၅) ကီလိုဂရမ် (၅.၅ ပေါင်) ပြည့်မီခြင်း မရှိခဲ့ဘူးဆိုရင် ပေါင်ချိန်မပြည့်ပဲ မွေးဖွားခြင်းအဖြစ် သတ်မှတ်နိုင်မှာ ဖြစ်ပါတယ်။ ပေါင်ချိန်မပြည့်ပဲ မွေးဖွားခြင်းကို အဓိက ဖြစ်ပွားစေတဲ့ အကြောင်းအရင်းကတော့ သတ်မှတ်ချိန် မတိုင်ခင် မွေးဖွားခြင်းပဲ ဖြစ်ပါတယ်။ လက်ရှိအချိန်မှာ ပေါင်ချိန်မပြည့်ပဲ မွေးဖွားလာတဲ့ ကလေးငယ်ဦးရေ (၈) ရာခိုင်နှုန်းခန့်အထိ ရှိနေခဲ့ပြီ ဖြစ်ပါတယ်။

ပေါင်ချိန်မပြည့်ပဲ မွေးဖွားခြင်းကို ဖြစ်ပွားစေနိုင်တဲ့ အကြောင်းအရင်းတွေကတော့ အောက်ပါအတိုင်းပဲ ဖြစ်ပါတယ်။

• သတ်မှတ်ချိန် မတိုင်ခင် မွေးဖွားခြင်း
• မိခင်အချင်းမှာ ပြဿနာရှိနေခြင်း
• အမြွှာပူးမွေးဖွားခြင်း
• ကိုယ်ဝန်ဆောင်မိခင်မှာ ကျန်းမာရေးဆိုင်ရာ ချို့ယွင်းမှုများ ရှိနေခြင်း
• ကိုယ်ဝန်ဆောင်မိခင် အရက်အလွန်အကျွံ သောက်သုံးခြင်း
• ကိုယ်ဝန်ဆောင်မိခင် မူးယစ်ဆေးဝါးများ သုံးစွဲခြင်း
• သန္ဓေသားလောင်း အာဟာရဓာတ် ချို့တဲ့ခြင်း

တကယ်လို့ မွေးဖွားလာတဲ့ ကလေးငယ်ရဲ့ ကိုယ်အလေးချိန်က သတ်မှတ် ကိုယ်အလေးချိန်ထက် လျော့နည်းနေခဲ့မယ် တစ်နည်းအားဖြင့် ပေါင်ချိန်မပြည့်ပဲ မွေးဖွားလာခဲ့မယ်ဆိုရင် -

• အဆုတ်အားနည်းခြင်း
• ခန္ဓာကိုယ်အစိတ်အပိုင်းများ ဖွံ့ဖြိုးမှု နောက်ကျခြင်း
• သွေးတွင်းသကြားဓာတ် လျော့နည်းခြင်း
• အစာချေစနစ် ကောင်းမွန်စွာ အလုပ်လုပ်နိုင်စွမ်း မရှိခြင်း
• အာရုံကြောဆိုင်ရာ ဝေဒနာများ ခံစားရခြင်း
• အမြင်အာရုံဝေဝါးခြင်း
• အကြားအာရုံ ချို့ယွင်းခြင်းစတဲ့ ဝေဒနာတွေကို ခံစားရနိုင်ပါတယ်။

တကယ်လို့ မွေးဖွားလာတဲ့ ကလေးငယ် ကိုယ်အလေးချိန် ပြည့်မီခဲ့ခြင်း မရှိဘူးဆိုရင် မိခင်နို့ရည် တစ်မျိုးထဲကိုသာ မကြာခဏ တိုက်ကျွေးပေးသင့်ပါတယ်။ မိခင်နို့ရည်မှာ ကလေးငယ်အတွက် လိုအပ်တဲ့ အာဟာရဓာတ်တွေ ကြွယ်ဝစွာ ပါဝင်တာကြောင့် မွေးကင်းစ ကလေးငယ် ဖွံ့ဖြိုးစေဖို့အတွက် များစွာသော အထောက်အကူကို ရရှိစေမှာ ဖြစ်ပါတယ်။  

‌ပေါင်ချိန်မပြည့်ပဲ မွေးဖွားလာခြင်းကို ကာကွယ်ချင်တယ် ဆိုရင်တော့ ကိုယ်ဝန်ဆောင်မိခင်တွေ အနေနဲ့ အောက်ပါ နည်းလမ်းတွေကို လိုက်နာဆောင်ရွက်သင့်ပါတယ်။

• ကိုယ်ဝန်ဆောင်နေစဉ် ကာလအတွင်း သက်ဆိုင်ရာ ဆရာဝန်နဲ့ တစ်လတစ်ကြိမ် စမ်းသပ်ကုသမှု ခံယူခြင်း
• ဆေးလိပ်ဖြတ်ခြင်း
  
• အရက်ဖြတ်ခြင်း
  
• အာဟာရဓာတ်ကြွယ်ဝစွာ ပါဝင်တဲ့ အစားအစာများ စားသုံးပေးခြင်း
  
• ခန္ဓာကိုယ်အလေးချိန်ကို ထိန်းညှိခြင်း

REF: HealthLine