Blue Baby Syndrome (ဘလူးဘေဘီဆင်ဒရုန်း) ဆိုတာကတော့ ကလေးငယ်ရဲ့ သွေးထဲမှာ ဟီမိုဂလိုဘင် (Hemoglobin) ပမာဏ နည်းပါးသွားတာကြောင့် အသားအရေတွေ အပြာရောင်အဖြစ် ပြောင်းလဲသွားခြင်းကို ဆိုလိုတာပဲ ဖြစ်ပါတယ်။ ဟီမိုဂလိုဂင် (Hemoglobin) ဆိုတာကတော့ သွေးတွင်း ပရိုတိန်းဓာတ် တစ်မျိုးဖြစ်ပြီး ခန္ဓာကိုယ်အတွင်းမှ နေရာအနှံ့ကို အောက်ဆီဂျင် ပို့လွှတ်ရာမှာ အသုံးပြုတဲ့ ဓာတ်တစ်မျိုးပဲ ဖြစ်ပါတယ်။ တကယ်လို့ သွေးတွင်းမှာ ဟီမိုဂလိုဘင် (Hemoglobin) နည်းပါးသွားမယ်ဆိုရင် ခန္ဓာကိုယ်အနှံ့ကို အောက်ဆီဂျင် ပို့လွှတ်နိုင်တော့မှာ မဟုတ်ပဲ ကလေးငယ်ရဲ့ အသားအရေတွေ အပြာရောင် အဖြစ် ပြောင်းလဲသွားမှာပဲ ဖြစ်ပါတယ်။

ဘလူးဘေဘီဆင်ဒရုန်း (Blue Baby Syndrome) ကို အဓိက ဖြစ်ပွားစေတဲ့ အကြောင်းအရင်းကတော့ နိုက်ထရိတ် (Nitrate) ပမာဏ လွန်ကဲတဲ့ ရေကြောင့်ပဲ ဖြစ်ပါတယ်။ နိုက်ထရိတ် ပမာဏ လွန်ကဲတဲ့ရေကို သောက်သုံးမိတဲ့အခါမှာ ရေထဲမှာ ပါဝင်တဲ့ နိုက်ထရိတ်ဓာတ် အနေနဲ့ မူလနိုက် (Nitrites) အဖြစ် ပြောင်းလဲသွားမှာ ဖြစ်ပါတယ်။ မူလနိုက် (Nitrites) အနေနဲ့ ခန္ဓာကိုယ် အတွင်းမှာ ဟီမိုဂလိုဘင် (Hemoglobin) နဲ့ပေါင်းစည်းသွားပြီး မက်ဟီမိုဂလိုဘင် (Methemoglobin) အဖြစ် ပြောင်းလဲသွားမှာ ဖြစ်ပါတယ်။ မက်ဟီမိုဂလိုဘင် (Methemoglobin) ကတော့ ဟီမိုဂလိုဘင် (Hemoglobin) လိုအောက်ဆီဂျင်ကို သယ်ယူပို့ဆောင်နိုင်စွမ်း မရှိတာကြောင့် ဘလူးဘေဘီဆင်ဒရုန်း (Blue Baby Syndrome) ကိုဖြစ်ပွားစေတာပဲ ဖြစ်ပါတယ်။

ဘလူးဘေဘီဆင်ဒရုန်း (Blue Baby Syndrome) ကိုများသာအားဖြင့် အသက် (၃) လအောက် ကလေးငယ်တွေမှာ မြင်တွေ့ရလေ့ ရှိပါတယ်။ ဒါ့အပြင် -

• ကျောက်ကပ်မကောင်းသူတွေ
• အစာအိမ်ရောဂါ ခံစားနေရသူတွေ
• ဟော်မုန်းကြောင့်ဖြစ်သော မူမမှန်ကြီးထွားရောဂါ (Genetic Predispositon) ကိုခံစားနေရသူတွေ အနေနဲ့လည်း ဘလူးဘေဘီဆင်ဒရုန်း (Blue Baby Syndrome) ကိုခံစားရလေ့ ရှိပါတယ်။

ဘလူးဘေဘီဆင်ဒရုန်း (Blue Baby Syndrome) ကိုခံစားရတဲ့အခါမှာ ခြေလက်တွေ၊ နှုတ်ခမ်းတွေ ပြာနှမ်းလာမှာ ဖြစ်တဲ့အပြင် -

• အသက်ရှူခက်ခြင်း
• အသက်ရှူမြန်ခြင်း
• နှလုံးခုန်မြန်ခြင်း
• အော့အန်ခြင်း
• ဝမ်းပျက်ခြင်း
• ပင်ပန်းနွမ်းနယ်ခြင်း
• တံတွေးထွက်နှုန်း လွန်ကဲခြင်း
• မှတ်ဉာဏ်ချို့ယွင်းခြင်း
• မူးဝေခြင်းစတဲ့ ရောဂါဝေဒနာတွေကို ခံစားရနိုင်ပါတယ်။

အချို့သော အခြေအနေတွေမှာ ဘလူးဘေဘီဆင်ဒရုန်းကြောင့် (Blue Baby Syndrome) ကလေးငယ်ရဲ့ အသက်အန္တရာယ်ကိုပါ ထိခိုက်စေနိုင်တာကြောင့် အထက်မှာ ဖော်ပြထားတဲ့ ရောဂါလက္ခဏတွေကို ခံစားနေရတယ် ဆိုရင်တော့ သက်ဆိုင်ရာ ဆရာဝန်နဲ့ အမြန်ဆုံး သွားရောက်ပြသသင့်ပါတယ်။

REF: MedicalNewsToday