ဝမ်းဗိုက်မှာ အဆီများစုနေခြင်းကြောင့် နှလုံးရောဂါ၊ သွေးတိုးရောဂါ၊ ဆီးချိုရောဂါ၊ ပန်းနာရင်ကြပ်ရောဂါ၊ အယ်လ်ဇိုင်းမားရောဂါတို့ကို ဖြစ်ပွားစေနိုင်ပါတယ်။ ဒီတော့ အထက်မှာ ဖော်ပြခဲ့တဲ့ ရောဂါတွေ ဖြစ်ပွားခြင်းကို ကာကွယ်နိုင်မယ့်အပြင် အဆီကျ လှပစေဖို့အတွက် စားသုံးသင့်တဲ့ အစားအစာတွေကို ဖော်ပြပေးလိုက်ရပါတယ်။

• စပျစ်သီး (အနီရောင်)

စပျစ်သီးကို နေ့စဉ်ပုံမှန် စားသုံးပေးခြင်းဖြင့် ဝမ်းဗိုက်မှာ စုနေတဲ့ အဆီပိုတွေကို အလွယ်တကူ ဖယ်ရှားပစ်နိုင်မှာ ဖြစ်ပါတယ်။ ဒါပေမယ့် အနီရောင် စပျစ်သီးတွေမှာ အစိမ်းရောင် စပျစ်သီးတွေထက် ဝမ်းဗိုက်အဆီပိုတွေကို ဖယ်ရှားပေးနိုင်မယ့် Phytonutrient တွေပါဝင်တာကြောင့် အနီရောင် စပျစ်သီးတွေကို ပိုမိုစားသုံးပေးသင့်ပါတယ်။

• ပန်းသီး

တစ်နေ့ကို ပန်းသီးတစ်လုံး ပုံမှန်စားသုံးပေးခြင်းကြောင့် ဝမ်းဗိုက်အဆီပိုတွေကို ဖယ်ရှားပေးနိုင်မှာ ဖြစ်တဲ့အပြင် ခန္ဓာကိုယ် သွယ်လျလှပစေမှာ ဖြစ်ပါတယ်။ လေ့လာတွေ့ရှိချက်တွေအရ ပန်းသီးမှာ ပါဝင်တဲ့ Ursolic အက်စစ် အနေနဲ့ ခန္ဓာကိုယ်အတွင်းမှ ကယ်လိုရီတွေကို လောင်ကျွမ်းစေမှာ ဖြစ်တဲ့အပြင် သွေးတွင်းသကြားဓာတ်ကိုလည်း ထိန်းညှိပေးမှာ ဖြစ်ပါတယ်။

• မြေပဲ

မြေပဲမှာလည်း စပျစ်သီးနည်းတူ Phytonutrient တွေပါဝင်တဲ့အပြင် ပရိုတိန်း ပါဝင်မှု များပြားတာကြောင့် ဝမ်းဗိုက်မှာ စုနေတဲ့ အဆီပိုတွေကို ဖယ်ရှားနိုင်မှာ ဖြစ်ပါတယ်။ ဒါ့အပြင် မြေပဲမှာ Phytic အက်စစ်နဲ့ ဖောလစ်အက်စစ် ပါဝင်တာကြောင့် ဝမ်းဗိုက်မှာ အဆီပိုတွေ စုနေခြင်းကို ကာကွယ်ပေးနိုင်မှာ ဖြစ်ပါတယ်။

• ဟင်းနုနွယ်ရွက်

ဟင်းနုနွယ်ရွက်မှာ ကယ်လိုရီ ပါဝင်မှု နည်းပါးတဲ့အပြင် နေ့စဉ်ပုံမှန် စားသုံးပေးခြင်းဖြင့် ခန္ဓာကိုယ်အတွင်းမှ အဆီပိုတွေကို လောင်ကျွမ်းစေမှာ ဖြစ်ပါတယ်။ ဒါ့အပြင် ဟင်းနုနွယ်ရွက်မှာ ဗီတာမင် K၊ ဗီတာမင် A၊ မဂ္ဂနီဆီယမ်၊ ဖောလစ်အက်စစ်၊ သံဓာတ်၊ ဗီတာမင် B တို့ပါဝင်တာကြောင့် ကျန်းမာရေးဆိုင်ရာ အကျိုးကျေးဇူးများစွာကို ရရှိနိုင်မှာ ဖြစ်ပါတယ်။

• ပဲပုပ်

ပဲပုပ်မှာ ပရိုတိန်း ကြွယ်ဝစွာ ပါဝင်တဲ့အပြင် ဝမ်းဗိုက်မှာ အဆီပိုတွေ စုနေခြင်းကို ဖယ်ရှားပေးနိုင်မယ့် အာဟာရဓာတ်တွေ ပါဝင်ပါတယ်။ ဒါ့အပြင် ပဲပုပ်မှာ ခန္ဓာကိုယ်အတွက် လိုအပ်တဲ့ သတ္တုဓာတ်တွေ ကြွယ်ဝစွာ ပါဝင်တာကြောင့် နေ့စဉ်ပုံမှန် စားသုံးသင့်ပါတယ်။

• ပြောင်းဖူး

ပြောင်းဖူးမှာ အမျှင်ဓာတ် ကြွယ်ဝစွာ ပါဝင်တာကြောင့် အစာအိမ်နဲ့အူလမ်းကြောင်းဆိုင်ရာ ရောဂါတွေ ဖြစ်ပွားမှုကို ကာကွယ်ပေးနိုင်မှာ ဖြစ်ပါတယ်။ ဒါ့အပြင် ပြောင်းဖူးမှာ Anthocyanins, Beta – Carotene, Caffeic Acid, Lutein, Coumaric Acid, Ferulic Acid, Zeaxanthin တို့ပါဝင်တာကြောင့် ဝမ်းဗိုက်မှာ စုနေတဲ့ အဆီပိုတွေကို ဖယ်ရှားပေးနိုင်မှာ ဖြစ်ပါတယ်။

• ငှက်ပျောသီး

ငှက်ပျောသီးမှာ ပိုတက်ဆီယမ်၊ မဂ္ဂနီဆီယမ်နဲ့ အမျှင်ဓာတ်တို့ ကြွယ်ဝစွာ ပါဝင်တာကြောင့် ကျန်းမာရေးအတွက် အထောက်အကူများစွာ ဖြစ်စေသလို အဆီပိုတွေကိုလည်း လောင်ကျွမ်းစေမှာ ဖြစ်ပါတယ်။

REF: Dr.Koop