ချစ်တင်းနှောခြင်းကြောင့် စိတ်ပိုင်းဆိုင်ရာ/ စိတ်ကျန်းမာရေးဆိုင်ရာ အကျိုးကျေးဇူးတွေ ရရှိနိုင်မှာ ဖြစ်သလို ရုပ်ပိုင်းဆိုင်ရာ အကျိုးကျေးဇူးတွေ များစွာလည်း ရရှိနိုင်မှာ ဖြစ်ပါတယ်။ ဒီတော့ ချစ်တင်းနှောခြင်းကြောင့် ရရှိနိုင်တဲ့ ကျန်းမာရေးဆိုင်ရာ အကျိုးကျေးဇူးတွေကို လေ့လာကြည့်လိုက်ရအောင်။

• ခုခံစွမ်းအားကို မြှင့်တင်ပေးခြင်း

ချစ်တင်းနှောခြင်းကြောင့် ခန္ဓာကိုယ်ရဲ့ ခုခံစွမ်းအားကို မြှင့်တင်ပေးနိုင်မှာ ဖြစ်ပါတယ်။ လေ့လာတွေ့ရှိချက်တွေအရ တစ်ပတ်ကို နှစ်ကြိမ်ခန့် ချစ်တင်းနှောခြင်းဖြင့် ခန္ဓာကိုယ်ရဲ့ ခုခံစွမ်းအားကို နှစ်ဆ ပိုမိုမြှင့်တင်နိုင်မှာ ဖြစ်တယ်လို့ သိရပါတယ်။

• သွေးပေါင်ချိန်ကို ထိန်းညှိပေးခြင်း

ချစ်တင်းနှောလို့ ပြီးသွားချိန် ကာမဆန္ဒ အထွတ်အထိပ်ကို ရောက်သွားခြင်းကြောင့် သွေးပေါင်ချိန် မြင့်တက်မှုကိုလည်း ထိန်းညှိပေးနိုင်မှာ ဖြစ်ပါတယ်။

• နှလုံးကျန်းမာရေးကို ကောင်းမွန်စေခြင်း

တစ်ပတ်ကို နှစ်ကြိမ်ခန့် ချစ်တင်းနှောခြင်းကြောင့် နှလုံးနဲ့သက်ဆိုင်တဲ့ ရောဂါတွေ ဖြစ်ပွားမှုကို ကာကွယ်ပေးနိင်မှာ ဖြစ်ပါတယ်။ ဒါပေမယ့်လည်း နေ့စဉ်ရက်ဆက် အမြဲလိုလို ချစ်တင်းနှောမယ် ဆိုရင်တော့ နှလုံးရောဂါကို ဖြစ်ပွားစေနိုင်တာကြောင့် သတိထားဖို့တော့ လိုအပ်ပါတယ်။

• ဆီးကျိတ်ကင်ဆာဖြစ်ပွားမှုကို ကာကွယ်ပေးခြင်း

ချစ်တင်းနှောခြင်း ပြီးဆုံးသွားလို့ သုက်ထုတ်လွှတ်ခြင်းကြောင့် အမျိုးသားတွေမှာ ဖြစ်ပွားလေ့ရှိတဲ့ ဆီးကျိတ်ကင်ဆာ ဖြစ်ပွားမှုကို ကာကွယ်နိုင်မှာဖြစ်ပါတယ်။ လေ့လာတွေ့ရှိချက်တွေအရ တစ်လကို ၂၁ ကြိမ်ခန့် သုက်ထုတ်လွှတ်ခြင်းကြောင့် ဆီးကျိတ်ကင်ဆာ ဖြစ်ပွားမှုကို သိသိသာသာ လျော့ချနိုင်မှာ ဖြစ်တယ်လို့ သိရပါတယ်။

• စိတ်ဖိဆီးမှုကို လျော့ချပေးခြင်း

ချစ်တင်းနှောခြင်းကြောင့် စိတ်ဖိဆီးမှုကို ဖြစ်ပွားစေတဲ့ Cortisol ဟော်မုန်း ထုတ်လွှတ်မှုကို လျော့ချပေးသွားမှာ ဖြစ်တဲ့အပြင် Oxytocin၊ Endorphin စတဲ့ စိတ်ကိုပျော်ရွှင်စေတဲ့ ဟော်မုန်းတွေကိုလည်း ထုတ်လွှတ်ပေးသွားမှာ ဖြစ်ပါတယ်။

• နှစ်ခြိုက်စွာ အိပ်ပျော်စေခြင်း

ချစ်တင်းနှောပြီး အထွတ်အထိပ်ရောက်သွားတဲ့အခါမှာ Oxytocin၊ Endorphin၊ Prolactin စတဲ့ ဟော်မုန်းတွေကို ထုတ်လွှတ်ပေးတာကြောင့် စိတ်ဖိဆီးမှုတွေ လျော့ကျသွားမှာ ဖြစ်တဲ့အပြင် နှစ်ခြိုက်စွာ အိပ်ပျော်စေမှာ ဖြစ်ပါတယ်။

• ကယ်လိုရီများကို လောင်ကျွမ်းစေခြင်း

ချစ်တင်းနှောတဲ့အခါမှာ ခန္ဓာကိုယ် လှုပ်ရှားမှုတွေ ပြုလုပ်ရတာကြောင့် ကယ်လိုရီတွေကို လောင်ကျွမ်းစေမှာ ဖြစ်ပါတယ်။ ကယ်လိုရီများ လောင်ကျွမ်းသွားခြင်းကြောင့် ခန္ဓာကိုယ်အလေးချိန်ကိုလည်း ထိန်းညှိနိုင်မှာ ဖြစ်ပါတယ်။

• နာကျင်မှုတွေကို ပြေလျော့စေခြင်း

ချစ်တင်းနှောခြင်းနဲ့ ပြီးမြောက်သွားချိန် အထွတ်အထိပ်ရောက်ခြင်းတို့ကြောင့် ခန္ဓာကိုယ် ကြွက်သားတွေ နာကျင်မှုကို ပြေလျော့စေနိုင်မှာ ဖြစ်ပါတယ်။ ဒါ့အပြင် ချစ်တင်းနှောခြင်းကြောင့် အမျိုးသမီးတွေ အနေနဲ့ ခေါင်းကိုက်ခြင်း၊ အကြောအဆစ်များကိုက်ခဲခြင်း၊ ဝမ်းဗိုက်အောက်ပိုင်း နာကျင်ခြင်းတို့ကိုလည်း ကာကွယ်ပေးနိင်မှာ ဖြစ်ပါတယ်။

• အရွယ်တင်စေခြင်း

ချစ်တင်းနှောတဲ့အခါမှာ ငယ်ရွယ်နုပျိုစေတဲ့ ဟော်မုန်းတွေဖြစ်တဲ့ Estrogen နဲ့ Testosterone တို့ကို ထုတ်လွှတ်ပေးတာကြောင့် အရွယ်တင်နုပျိုစေမှာ ဖြစ်ပါတယ်။ တကယ်လို့ သင့်အနေနဲ့ အရွယ်တင်နုပျိုချင်တယ် ဆိုရင်တော့ တစ်ပတ်ကို လေးကြိမ်ခန့် ပုံမှန် ချစ်တင်းနှောပေးသင့်ပါတယ်။

REF: MedicalNewsToday, OnHealth