အူမကြီးကင်ဆာဆိုတာကတော့ ကမ္ဘာပေါ်မှာ တတိယအဖြစ်အများဆုံး ကင်ဆာရောဂါတစ်မျိုးပဲ ဖြစ်ပါတယ်။ အူမကြီးကင်ဆာ ဖြစ်ပွားရခြင်းရဲ့ အဓိကအကြောင်းအရင်းကတော့ Bacteroides ဆိုတဲ့ ဘက်တီးရီးယားပိုးကြောင့်ပဲ ဖြစ်ပါတယ်။ ဒီတော့ အူမကြီးကင်ဆာဖြစ်ပွားခြင်း မရှိအောင် ကာကွယ်နိုင်မယ့် နည်းလမ်းတွေကို လေ့လာကြည့်လိုက်ရအောင်။

• ခန္ဓာကိုယ်အလေးချိန်ကို ထိန်းညှိပေးပါ

ဆေးလိပ်သောက်ခြင်းအပြင် ကင်ဆာရောဂါကို အများဆုံး ဖြစ်ပွားစေတဲ့ အကြောင်းအရင်းကတော့ ခန္ဓာကိုယ် အလေးချိန် မြင့်တက်ခြင်းကြောင့်ပဲ ဖြစ်ပါတယ်။ အဝလွန်ခြင်းကြောင့် ကင်ဆာရောဂါ ၁၁ မျိုး အထိ ဖြစ်ပွားစေနိုင်သလို အခြားသော ရောဂါဝေဒနာများစွာကိုလည်း ခံစားရစေနိုင်ပါတယ်။ ဒါကြောင့် အတတ်နိုင်ဆုံး ခန္ဓာကိုယ်အလေးချိန်ကို ထိန်းညှိပေးဖို့ လိုအပ်ပါတယ်။

• ဆေးလိပ်ဖြတ်ပါ

ဆေးလိပ်သောက်ခြင်းကြောင့် အဆုတ်ကင်ဆာ၊ နှလုံးကင်ဆာ၊ လေဖြတ်ခြင်းစတဲ့ ဝေဒနာတွေကို ဖြစ်ပွားစေနိုင်သလို အဆုတ်ကင်ဆာရောဂါကိုလည်း ဖြစ်ပွားစေနိုင်ပါတယ်။ ဒါ့အပြင် ဆေးလိပ်နဲ့ဆေးရွက်ကြီး သုံးစွဲမှုကြောင့် အူမကြီးကင်ဆာရောဂါ ဖြစ်ပွားသူ ၁၂ ရာခိုင်နှုန်းခန့် မြင့်တက်လာခဲ့ပါတယ်။ ဒါကြောင့် ဆေးလိပ်နဲ့ဆေးရွက်ကြီး သုံးစွဲမှုကို ရှောင်ကြဉ်သင့်ပါတယ်။

• လေ့ကျင့်ခန်း ပုံမှန်ပြုလုပ်ပေးပါ

လေ့ကျင့်ခန်း ပုံမှန်ပြုလုပ်ပေးခြင်းဖြင့် ခန္ဓာကိုယ်အလေးချိန်ကို ထိန်းညှိပေးနိုင်မှာ ဖြစ်သလို အူမကြီးကင်ဆာရောဂါ အပါအဝင် အခြားရောဂါတွေ ဖြစ်ပွားမှုကိုလည်း ကာကွယ်ပေးနိုင်မှာ ဖြစ်တဲ့အပြင် စိတ်စွမ်းအားကိုလည်း မြှင့်တင်ပေးနိုင်မှာ ဖြစ်ပါတယ်။ ဒါကြောင့် တစ်နေ့ကို မိနစ် ၃၀ ခန့် ကိုယ်လက်လှုပ်ရှား လေ့ကျင့်ခန်းတွေကို ပုံမှန်ပြုလုပ်ပေးသင့်ပါတယ်။

• အကျိုးပြုအဏုဇီဝ (Probiotics) ပါဝင်သော အစားအစာများကို စားသုံးပေးပါ

ဒိန်ချဉ်၊ မီဆိုဟင်းချို၊ ကင်မ်ချီနဲ့ ဆားရေစိမ်အသီးအနှံများကို နေ့စဉ်ပုံမှန် စားသုံးပေးခြင်းကြောင့် အစာချေစနစ်ကို ကောင်းမွန်စေမှာဖြစ်တဲ့အပြင် အစာအိမ်နဲ့အူလမ်းကြောင်းဆိုင်ရာ ရောဂါတွေနဲ့ အူမကြီးကင်ဆာ ဖြစ်ပွားမှုကို ကာကွယ်ပေးနိုင်မှာ ဖြစ်ပါတယ်။

•  အနီရောင်အသားများ အလွန်အကျွံ စားသုံးခြင်းကို ရှောင်ကြဉ်ပါ

အနီရောင်အသားတွေဖြစ်တဲ့ အမဲသား၊ သိုးသား၊ ဆိတ်သားတို့ကို အလွန်အကျွံ စားသုံးခြင်းကြောင့်လည်း အူမကြီးကင်ဆာရောဂါကို ဖြစ်ပွားစေနိုင်ပါတယ်။ ဒါ့အပြင် ဟမ်ဘာဂါတွေ၊ အသားကင်တွေ၊ ဝက်ပေါင်ခြောက်တွေ၊ ကြက်အူချောင်းတွေ၊ ဝက်အူချောင်းတွေကို အလွန်အကျွံ စားသုံးမယ်ဆိုရင်လည်း အူမကြီးကင်ဆာရောဂါကို ဖြစ်ပွားစေနိုင်ပါတယ်။

• အရက်သေစာသောက်သုံးခြင်းကို ရှောင်ကြဉ်ပါ

အရက်အလွန်အကျွံ သောက်သုံးမယ်ဆိုရင်လည်း အူမကြီးကင်ဆာရောဂါကို ဖြစ်ပွားစေနိုင်တာကြောင့် အရက်သေစာ သောက်သုံးခြင်းကိုလည်း တတ်နိုင်သမျှ ရှောင်ကြဉ်သင့်ပါတယ်။

• ကယ်ဆီယမ်နဲ့ ဗီတာမင် D ပါဝင်တဲ့ အစားအစာတွေကို စားသုံးပေးပါ

လေ့လာတွေ့ရှိချက်တွေအရ ကယ်ဆီယမ်နဲ့ ဗီတာမင် D ပါဝင်တဲ့ အစားအစာတွေကို ပုံမှန်စားသုံးပေးခြင်းဖြင့် အူမကြီးကင်ဆာ ဖြစ်ပွားမှုကို ကာကွယ်ပေးနိုင်တယ်လို့ သိရပါတယ်။ ဒါကြောင့် ဗီတာမင် D ပါဝင်တဲ့ ဆဲလ်မွန်ငါးတွေ၊ ငါးကြီးဆီတွေ၊ ပုစွန်တွေ၊ ကြက်ဥတွေ၊ မှိုတွေနဲ့ ကယ်ဆီယမ် ပါဝင်တဲ့ အစေ့တွေ၊ ဒိန်ခဲတွေ၊ ဒိန်ချဉ်တွေ၊ တိုဟူးတွေ၊ နို့တွေကို နေ့စဉ်ပုံမှန် စားသုံးပေးသင့်ပါတယ်။

REF: EverydayHealth, SiteMan