အယ်လ်ဇိုင်းမားရောဂါဆိုတာကတော့ သိစိတ်ချို့ယွင်းတဲ့ ရောဂါတစ်မျိုးပဲ ဖြစ်ပါတယ်။ အယ်လ်ဇိုင်းမားရောဂါကို ကုသဖို့အတွက် လက်ရှိအချိန်ထိ နည်းလမ်းမရှိသေးတဲ့အပြင် ရောဂါဖြစ်ချိန် ကြာလာတာနဲ့အမျှ တဖြည်းဖြည်း ဆိုးဝါးလာပြီး နောက်ဆုံးမှာ အသက်အန္တရာယ်ကို ထိခိုက်စေတဲ့အထိ ဆိုးဝါးစေနိုင်ပါတယ်။ ဒါကြောင့် အယ်လ်ဇိုင်းမားရောဂါဖြစ်ပွားမှုကို ကာကွယ်ပေးပြီး ဦးနှောက်ဖွံ့ဖြိုးမှုကို အထောက်အကူဖြစ်စေမယ့် အစားအစာတွေကို အခုလို ဖော်ပြပေးလိုက်ရတာ ဖြစ်ပါတယ်။

• သံလွင်ဆီ

သံလွင်ဆီကို ပုံမှန်စားသုံးခြင်းကြောင့် မှတ်ဉာဏ်ဖွံ့ဖြိုးမှုကို အထောက်အကူပြုစေမှာဖြစ်တဲ့အပြင် အယ်လ်ဇိုင်းမားရောဂါဖြစ်ပွားမှုကိုလည်း ကာကွယ်ပေးနိုင်မှာ ဖြစ်ပါတယ်။ ဒါ့အပြင် သံလွင်ဆီကို စားသုံးခြင်းကြောင့် နှလုံးရောဂါဖြစ်ပွားမှုကိုလည်း ကာကွယ်‌ပေးနိုင်မှာဖြစ်ပြီး ခန္ဓာကိုယ်အတွင်းမှ မလိုအပ်တဲ့ အဆီပိုတွေကိုလည်း ဖယ်ရှားပေးနိုင်မှာ ဖြစ်ပါတယ်။

• ဆဲလ်မွန်ငါး

အိုမီဂါ ၃ ဖက်တီးအက်စစ် ပါဝင်တဲ့ အသားငါးတွေကို စားသုံးပေးခြင်းဖြင့် မှတ်ဉာဏ်စွမ်းအင်ကို တိုးတက်စေမှာ ဖြစ်ပါတယ်။ ဆဲလ်မွန်ငါးမှာ အိုမီဂါ ၃ ဖက်တီးအက်စစ် ကြွယ်ဝစွာ ပါဝင်တာကြောင့် အယ်လ်ဇိုင်းမားရောဂါ ဖြစ်ပွားမှုကို ကာကွယ်ပေးနိုင်မှာ ဖြစ်ပါတယ်။ ဆဲလ်မွန်ငါးအပြင် ငါးပါးနီနဲ့ ငါးသေတ္တတို့မှာလည်း အိုမီဂါ ၃ ဖက်တီးအက်စစ် ပါဝင်ပါတယ်။

• ဘယ်ရီသီး

ဘလူးဘယ်ရီသီးနဲ့ ဘလက်ဘယ်ရီသီးတို့မှာ အန်တီအောက်ဆီဒန့်တွေ ကြွယ်ဝစွာ ပါဝင်တာကြောင့် ဦးနှောက်ကို ထိခိုက်စေမယ့် ဆဲလ်အသေတွေကို ဖယ်ရှားပေးနိုင်မှာ ဖြစ်ပါတယ်။ အိုမီဂါ ၃ ဖက်တီးအက်စစ်နည်းတူ အန်တီအောက်ဆီဒန့်တွေကို ကျွန်တော်တို့ ခန္ဓာကိုယ်အတွင်းမှာ ထုတ်လုပ်နိုင်ခြင်း မရှိတာကြောင့် ဦးနှောက်ကျန်းမာရေးအတွက် အန်တီအောက်ဆီဒန့် ပါဝင်တဲ့ ဘယ်ရီသီးတွေကို နေ့စဉ်ပုံမှန် စားသုံးပေးသင့်ပါတယ်။

• ပဲများ

ဦးနှောက်ဖွံ့ဖြိုးမှုနဲ့ အယ်လ်ဇိုင်းမားရောဂါဖြစ်ပွားမှုကို ကာကွယ်ဖို့ အတွက် ဗီတာမင် B ဓာတ်ကို အဓိကအနေနဲ့ လိုအပ်ပါတယ်။ ပဲတွေမှာ ဗီတာမင် B ဓာတ် ကြွယ်ဝစွာ ပါဝင်တဲ့အပြင် ခန္ဓာကိုယ်အတွက် လိုအပ်တဲ့ ပရိုတိန်း၊ အမျှင်ဓာတ်၊ ကယ်ဆီယမ်၊ သံဓာတ်၊ မဂ္ဂနီဆီယမ်၊ ပိုတက်ဆီယမ်၊ ဖိုလိတ်အက်စစ်တို့ ပါဝင်တာကြောင့် နေ့စဉ်ပုံမှန် စားသုံးပေးသင့်ပါတယ်။

• ကန်စွန်းဥ

ကန်စွန်းဥမှာ ဦးနှောက်နဲ့ မှတ်ဉာဏ်စွမ်းအင်ကို မြှင့်တင်ပေးနိုင်တဲ့ အန်တီအောက်ဆီဒန့်၊ ဖိုလိတ်အက်စစ်တို့ ကြွယ်ဝစွာ ပါဝင်တာကြောင့် အယ်လ်ဇိုင်းမားရောဂါ ဖြစ်ပွားမှုကို ကာကွယ်ပေးနိုင်မှာ ဖြစ်ပါတယ်။

• ကိုက်လန်

ကိုက်လန်မှာလည်း အခြားအသီးအနှံတွေနည်းတူ ဗီတာမင် K ဓာတ်ကြွယ်ဝစွာ ပါဝင်တာကြောင့် မှတ်ဉာဏ်စွမ်းအင်ကို မြှင့်တင်ပေးနိုင်မှာ ဖြစ်ပါတယ်။

• ဂေါ်ဖီပန်းပွင့်

ဂေါ်ဖီပန်းပွင့်မှာ ဖိုလိတ်အက်စစ်၊ အန်တီအောက်ဆီဒန့်၊ ဗီတာမင် C တို့ပါဝင်တာကြောင့် ဦးနှောက်စွမ်းဆောင်ရည်ကို မြှင့်တင်ပေးနိုင်မှာ ဖြစ်ပါတယ်။ ဒါ့အပြင် ဗီတာမင် C အနေနဲ့ အယ်လ်ဇိုင်းမားရောဂါ ဖြစ်ပွားမှုကို ကာကွယ်ပေးနိုင်မှာ ဖြစ်တာကြောင့် ဂေါ်ဖီပန်းပွင့်ကို နေ့စဉ်ပုံမှန် စားသုံးသင့်ပါတယ်။

• သစ်ချသီး

သစ်ချသီးကို ပုံမှန်စားသုံးပေးခြင်းကြောင့် အစာအိမ်နဲ့အူလမ်ကြောင်းဆိုင်ရာရောဂါများဖြစ်ပွားခြင်း၊ ကင်ဆာရောဂါဖြစ်ပွားခြင်း၊ ဆီးချိုရောဂါဖြစ်ပွားခြင်းတို့ကို ကာကွယ်ပေးနိုင်မှာဖြစ်တဲ့အပြင် သစ်ချသီးမှာ ပိုလီဖီနော (Polyphenols) ၊ ဗီတာမင် E တို့ပါဝင်တာကြောင့် ဦးနှောက်နဲ့သက်ဆိုင်တဲ့ရောဂါများ ဖြစ်ပွားမှုကို ကာကွယ်ပေးနိုင်မှာ ဖြစ်ပါတယ်။

• သိုးကလေးသား

အယ်လ်ဇိုင်းမားရောဂါ ဖြစ်ပွားမှုကို ကာကွယ်ပေးနိုင်မယ့် အိုမီဂါ ၃ ဖက်တီးအက်စစ်ကို ပင်လယ်စာငါးတွေအပြင် သိုးကလေးသားကနေ တစ်ဆင့်လည်း ရရှိနိုင်ပါတယ်။ ဒါ့အပြင် သိုးကလေးသားမှာ ဗီတာမင် B လည်း ပါဝင်တာကြောင့် ဦးနှောက်ဖွံ့ဖြိုးမှုကို အထောက်အကူဖြစ်စေမှာ အသေအချာပါပဲ။

REF: EverydayHealth